Pistons mikagar na sab

CEBU – Gibaswat sa Philadelphia Sixers reserve nga si Donyell Marshall ang iyang team pinaagi sa pagpasulod ug usa ka krusyal nga three-point shot sa kataposang 38 segundos aron pagpukan sa Detroit Pistons kagahapon sa nagpadayong aksiyon sa 2008-2009 season sa National Basketball Association (NBA) didto sa The Palace of Auburn Hills sa Michigan. Si Marshall kinsa 14 na tuig nga NBA verteran, gire-activate sa Sixers tungod kay ang ilang leading scorer nga si Elton Brand naka-angkon man ug hamstring injury human sila mapilde sa Los Angeles Lakers kaniadtong Miyerkoles.

“When we got up by two, it really lifted the guys, because it got us over the one-point hump,” matod pa ni Marshall nga mi-iskor lang ug walo ka puntos sa maong duwa.

Si Andre Miller maoy nangu sa Sixers pinaagi sa iyang 19 puntos samtang sila si Louis Williams ug Andre Iguodala mitampo ug 16 ug 14 puntos.

Wala na makahigayon ug silkit ug usab ang Pistons dihang misipyat si allen Iverson ug ang tip-in ni Rasheed Wallace igo lang misabod sa ring ug migawas.

Upat ka Pistons ang mi-iskor ug double figures pinagulohan ni Richard Hamilton kinsa mihipos ug 19 puntos ug gisundan siya ni Iverson sa iyang 17 puntos. Mi-iskor sab si Rodney Stuckey ug 16 puntos samtang may 12 puntos si Tayshaun Prince.

Sa laing bahin, diriyot madisgrasya ang Los Angeles Lakers apan nakahigayon lang gihapon pag-iskor ug 106-104 nga kadaugan batok sa Washington Wizards.

Menos ug field goals si Kobe Bryant apan siya lang gihapon maoy nangu sa Lakers pinaagi sa paghakot ug 23 puntos. Si Andrew Bynum mitampo ug 19 puntos, 10 ka rebounds ug usa ka assist alang sa Lakers.

Ang Wizards gipangulohan ni Caron Butler pinaagi sa iyang 26 puntios, siyam ka rebounds ug upat ka assists.

Sa uban pang duwa, midaug ang Orlando Magic batok sa Oklahoma Thunder, 98-89, gimakmak sa Cleveland Cavaliers ang Indiana Pacers, 97-73, gikulata sa New Jersey Nets ang Minnestoa Timberwolves, 113-84, gipakaging sa Atlanta Hakws ang New York Knicks, 98-95, gipaak sa Memphis Grizzlies ang Los Angeles Clippers, 93-81, midaug ang Milwaukee Bucks batok sa Charlotte Bobcats, 101-96, yanong gipukan sa Houston Rockets ang Golden State Warriors, 131-112, gilat-an sa Utah Jazz ang Toronto Raptors, 114-87 ug gipakgang sa defneding champion ang Portland Trail Blazers, 93-78 didto sa ilang korte sa TD Banknorth Garden sa Boston, Massachusetts. – BANAT NEWS