CEBU - Andam na ang tanan alang sa pagpahigayon sa First Community Outreach Children’s Games karong Disyembre 22-23 diha sa Cebu City Sports Center.
Napulo ka teams ang moapil sa labing unang pagpahigayon sa maong kalihukan, duha kini nagagikan sa Muslim community, usa gikan sa streetchildren ug ang nahabilin gikan sa nagkadaiyang mga barangay.
Ang duha ka adlaw nga kompetisyon adunay unom ka sporting events -- athletics, basketball, table tennis, volleyball, badminton ug chess.
Ang Muslims ug Christian out-of-school youths maoy kasagaran nga nalambigit sa maong kalihukan nga gipasiugdahan ni Philippine Sports Commissioner Fr. Vicente ‘Vic’ L. Uy, SVD.
Nagtuo ang PSC nga adunay daghang mga talento sa mga probinsiya nga angay’ng ugmaron aron mamahimong kalibre nga mga atleta ug makahatag og dungog ug garbo sa nasud sa mga dagkung mga kompetisyon dinhi ug gawas sa nasud. (BANAT NEWS)