Blue, Green teams mag-ilog sa korona Yellow, Red magtigi sa ikatulong dapit

CEBU -  Pulos gipanglubong sa Blue ug Green teams ang tagsa-tagsa nila ka kaatbang sa ilang tinaktakay nga semifinal aron pag-angkon og luna sa finals sa 2008 Prince Basketball Association (PBA) Prince Warehouse Club Inc.-Mandaue basketball tournament niadtong Sabado sa gabii didto sa Looc gym, dakbayan sa Mandaue.

Unang nakasulod sa finals ang Blue team dihang gipilde ang Red team sa iskor nga 84-65, samtang ang Green team maoy misakmit sa katapusang luna pinaagi gihapon sa paglubong sa Yellow team sa iskor nga 81-69.

Ang Blue-Green final showdown duwaon karong gabii didto sa Pajo basketball gym sa Lapu-Lapu City.

Ang Yellow ug Red teams maoy magsangka sa pasiunang duwa alang sa ikatulong dapit.  

Sa gihapon, si Jophel Roble maoy nangulo sa Blue team pinaagi sa iyang 23, gisundan ni Balingcasag, kinsa miabuno og 16 puntos, sila si Apostol M. ug Sital M. nagkumboya og 25 puntos.

Ang pilderong Red gipangulohan sab ni Oyangoren L. kinsa mibahog og 19, si Tampus O. igo lang mi-iskor og 10 puntos.

Sa laing bahin, sila si Nelson Go ug Jimmy Coyoca   milansang og 20 puntos matag usa aron pangulohan ang Green team, samtang si Rogelio Defiesta mao sab ang topscorer sa Yellow pinaagi sa iyang 19 puntos. Laing tulo ang mi-iskor og double figures alang sa Yellow team.

Si Gilborion F. miamot og 15 puntos, si Paje J. mitampo og 12 puntos, samtang usa sa ilang sinaligan nga si Chelo Pepito igo lang nakaabot og 10 puntos.

Daku'g purohan nga maangkon sa Green team ang korona gumikan sa ilang gidak-on, gawas pa, gilangkuban sab kini og mga batan-ong magduduwa.

Dili sab hinuon kompiyansaan ang Blue team kay wala kini makatilaw og pilde sa upat ka eliminasyon.

Sa laing bahin, si Blake Nelson Go, ang general manager sa Prince Warehouse Inc. gipaabot nga mosaksi sa kampiyonato. Si Go mismo ang mohatag sa awards ngadto sa mga mananaog ning maong kompetisyon nga gipasiugdahan ni Ephrail Joern Omoso, ang Customer Relations Officer sa Prince Warehouse Club Inc.-Mandaue. - Yoyo R. Abayan (BANAT NEWS)