CEBU - (WBO)minimum weight champion Donnie Nietes gikatakdang modepensa sa iyang bakus batok sa Mehikanong si Erik Ramirez sa Pebrero sunod tuig sa wala pa masayring binyu. Mao kini ang gipadayag sa boxing patron ug ALA Gym chairman Tony Aldeguer atol sa interview sa insidesports.ph.
Nagkanayon si Aldeguer nga mao kini ang ilang nahukman sa ALA Gym human sila makadawat og rekomendasyon gikan ni
international matchmaker Sampson Lewkowicz nga si Ramirez mao ang ikasangka ni Nietes sa sunod niyang pagdepensa sa korona.
Ang 26-anyos nga si Ramirez mao karon ang ranked No. 2 sa WBO, kinsa nagkupot karon og 25-5-1 uban ang 19 ka knockouts.
Si Ramirez misuway og ilog sa WBC Continental America title nga gihuptan ni Lorenzo Trejo apan pakyas, human ma-TKO sa ikapitong round. Gikan niadto, si Ramirez mikulit og lima ka sunod-sunod nga kadaugan, diin upat niini pinaagi sa knockout.
Niadtong Septiyembre 13, si Ramirez nidaog sa unanimous decision batok ni Jose Ortiz alang sa bakanteng WBO Latino title.
Sa iyang bahin, si Nietes mipakita na sa iyang kaandam alang ning maong awaya. Ang 26-anyos nga kampiyon nagtangag karon og rekord nga 23-1-3, 14KOs.
Si Nietes milampos pag-ilog sa bakanteng WBO crown niadtong Septiyembre 30, 2007 pinaagi sa unanimous decision batok sa Thai boxer Pornsawan Kartingdaenggym, nasundan kini pinaagi sa pagtumba sa ikaduhang hugna ni Eddie Castro niadtong Agosto 30, 2008 didto sa Waterfront Hotel in Cebu City. - BANAT NEWS