Red Bull gipanitan sa Kings

CEBU - Milampos ang Barangay Ginebra Kings pagposte og daog pinaagi sa pag-ihaw sa Red Bull Barakos, 83-76 sa KFC-PBA Philippine Cup kagabii sa Araneta Coliseum.

Ang Kings, kinsa mikulit sa ilang ikaupat ka sunod-sunod mipahiluna karon sa ikalimang dapit sa standing nga nagkupot og 7-6 win-loss record.

Gipakita sa mga batos ni coach Jong Uichico nga pabilin gihapon ang ilang kalibre isip usa ka championship team dihang gidominar sa Kings ang nag-unang duha ka kuwarter, atol sa third quarter gitukod sa Kings ang kinadak-an nilang labaw nga 14 puntos sa iskor nga 66-52.

Apan wala magpa-alkanse ang Barakos dihang mihimo kini og 15-3 run aron pag-ingkib sa dakung labaw sa Kings ngadto sa tres puntos nga labaw, 73-70 sa nahabiling 5:44 sa duwa. Aron mapakgang ang giplanong rally sa Barakos, sila si Junthy Valenzuela ug Ronald Tubid mipaulan og duha ka three-point shots aron hingpit nga biyaan ang Barakos.

Si Tubid miposte og 16 puntos uban ang 11 ka rebounds ug tulo ka assists aron pangulohan ang Kings.

Sa ilang bahin, ang Barakos nga nakatagamtam karon sa ilang ikapitong sunod-sunod nga kapildihan gipangulohan ni Cyrus Baguio nga mipugnit og 16 puntos uban ang tulo ka rebounds.

Ang Barakos pabiling nagbitay sa standing sa ilang 3-10. (Lemuel P. Maglinte)

Indiana giluwas ni Murphy

Ang tip-in ni Troy Murphy dayong tingog sa final buzzer, maoy nakaluwas sa Indiana Pacers batok sa nanulong nga Los Angeles Lakers, 118-117 sa National Basketball Association (NBA) 2008-2009 season didto sa Conseco Fieldhouse sa Indianapolis, Indiana.

Ang Pacers nga adunay 7-10 nga baraha nabiyaan og 15 puntos pagsugod sa fourth quarter sa iskor nga 86-101, apan hinay-hinay nilang natibhangan ang ilang biya dihang milusad sila og 10-0 run, 98-105 ug nakasikit pa sa iskor nga 114-115 human sa three-point shot ni Danny Granger sa katapusang 1:42 sa duwa.

Si Granger maoy nangu sa Pacers sa iyang 32 puntos, samtang si TJ Ford mitampo og 21 puntos. Tulo sa ilang starting unit nga sila si Murphy, Marquis Daniels ug Rasho Nesterovic ang mirehistro og 16 puntos matag usa. 

Ang starting five sa Lakers pulos sab naka-iskor og double figures nga gipangunahan ni Bryant sa iyang 28 puntos.

Sa laing duwa, ang Portland Trailblazers midaog batok sa New York Knicks sa iskor nga 104-97 didto sa Madison Square Garden sa New York City.

Si Brandon Roy miposte og 23 puntos alang sa Trailblazers, samtang dos puntos lang ang nakuha ni Greg Oden.

Si Chris Duhon mi-iskor sab og 23 puntos, uban ang 13 ka assists alang sa Knicks 

Ang Philadelphia Sixers midaog batok sa Chicago Bulls sa overtime sa iskor nga 103-95, gipanitan sab sa Washington Wizards ang New Jersey Nets sa iskor nga 108-88, midaog sab ang Utah Jazz batok sa Sacramento Kings sa iskor nga 99-94 ug ang Dallas Mavericks nakaipsot sa Los Angeles Clippers sa iskor nga 100-98. - Gabby G. Malagar (BANAT NEWS)