Minglanilla mikabkab og daghang bulawan

CEBU - Nabulahan ang Minglanilla teams kay mihakot kini og daghang daog sa unang adlaw sa 2008 Provincial Meet kagahapon didto sa Liloan Central School.

Si Jhaye Rabia mikabkab og bulawan sa elementary boys shotput event nga mipatugpa sa iron ball sa gilay-on nga 7.51 meters. Si Christofferson Mantuhac sa Balamban miangkon sa silver sa gilay-on nga 7.3m, samtang si John Michael Emia sa Ginatilan midaog sa bronze sa iyang 6.56m.

Ang 12-anyos nga si Rabia napunta lang sa ikapito sa miaging tuig, apan tungod sa iyang determinasyon nakahimo kini pagpahiluna sa kinatas-ang dapit.

Si Rabia nagtinguha nga mokabkab og laing bulawan karong adlawa sa dihang mopakita kini'g aksiyon sa discus ug javelin throw events.

Sa secondary division, ang silver medalist sa miaging tuig nga si Idelfonso Pino sa Daanbantayan mao sab ang nidaog sa bulawan sa gilay-on nga 9.30m. Ang ikaduha ug ikatulo nga dapit nakuha nila ni Edmarhino Layese sa Bantayan (9.29m) ug Leo Busmeon sa Santander (8.10m).

Sa pikas bahin, si Blyth Ann Alvarado sa Sibonga misakmit sa bulawan sa elementary division sa iyang 6.57m.

Gipukan ni Alvarado si Melissa Caya sa Liloan, kinsa nakakuha lang og 6.31m, samtang si Gia Bucay sa Balamban nahimutang sa ikatulo sa iyang 6.19m.

Sa elementary basketball, ang Minglanilla midaog sa unang duha nila ka duwa aron malamdagan ang kampanya alang sa kampiyonato.

Gilubong sa Minglanilla ang Balamban sa iskor nga 70-34 ug milansang sab kini og 49-44 nga kadaugan batok sa Cordova.

Sa secondary, ang Alegria maoy mipatigbabaw dihang ilang gipilde ang San Fernando, 91-82.

Sa elementary boys volleyball, ang co-host Compostela mirehistro og duha ka daog dihang ilang gipilde ang Oslob ug Liloan.

Ang Moalboal midaog sab batok sa Tuburan, apan wala kini makasugakod sa sunod nga duwa kay gipukan kini sa Bantayan.

Sa laing bahin, ang Dumanjug mipukan sa Daanbantayan, samtang ang Pilar mimakmak sa Cordova. (BANAT NEWS)