CEBU - Karong umaabot Domingo, Disyembre 7 dakung sambunot ang mahitabo sa ibabaw sa ring nga gi-atngan sa tibuok kalibotan. Kini mao ang boksing tali sa RP vs. United States of America.
Ambot og susama ba kaha kakusog sa bagyo o tornado ang kumo ni Pacquiao nga daku man gyud og pagsalig ang minilyon ka mga Pinoy nga mudaog si Pacman batok ni Golden Boy ug gani dili lang kay mudaog ma-knockout pa gyud kuno.
Kining atong pagkahilabihang sipsip ngadto ni Pacquiao nga mora ta’g linta o alimatok, mora’g dili maayong pasobrahan kay matud pa bitaw “blessed are those who never expects for they shall never be disappointed.”
* * *
Akong tan-aw nga kun gipangpilde ni Pacquaio ang mga Mehikanong boksidor, lahi intawon kini si De la Hoya kay bisan kini’g Mehikano, didto kini magtubo sa America ug dili kini pobre’g kaliwat sama sa ubang mga taga-Mexico nga mais ug buwad ang kinaon.
Si De la Hoya didto makat-on og boksing sa Amerika ug dili kini til-ogon nga boksidor kay usa siya ka Olympic gold medalist ug gani mas grabe pa siya’g kasinatian kay ni Pacquiao kun boxing career ang hisgutan.
Kadtong mga Mehikano nga gipangpilde ni Pacquiao dili kadto susama’g kalibre ni De la Hoya kay sila didto ra kutob sa Mexico magbansay-bansay. Ang timailhan nga dili gani siya makamao mosulti’g Iningles ug bisan pa tuod og grabe sab sila’g training susama sa ubang mga boksidor. Alang nako dili gyud hilabwan ang training ni De la Hoya kun itandi ni Pacquiao. Kanus-a man kuno makalabaw ang Pilipinas sa America?
Ang atua lang gyud hambog nga makasustenir og world-class ang atong kalibre. Kun wala ako masayop, mata’g adunay matikyaob nga Mehikanong boksidor, nag-aligutgot sab ang dughan ni De la Hoya, sama sab nga kun matikangkang si Pacquiao modayon sab kita’g lingiw kay maluoy kita magtan-aw nga magkamuretsing ang dagway.
Lain si De la Hoya ug lain sab sila si Marco Antonio Barrera ug Juan Manuel Marquez.
Kita gud mga Pinoy kun adunay kaaway nga taga laing lugar ang atong tan-aw dili kamao kay kita ra may maantigo.
Hunahunaa ba Pacquiao nga si De la Hoya adunay utok, adunay kamot ug duha ka tiil.
Timan-i sab nga si De la Hoya adunay maayong estilo ug dili pugoso nga boksidor. Tungod kay wala pa man kita masayod unsay resulta, maayo tingali nga dili lang una kini nato hisgutan og maayo.
Mosaludo ko ni Pacquiao kun modaug, apan kun mapilde mo-ingon ko mirisi kay mag-una imong pasiatab wala pa gani mahitabo.
* * *
SG. Congratulations to my sister Gigi and her husband Boy Quindao of barangay Owak, Ormoc City for the renewal of their marriage vows during their 8th wedding anniversary last November 11, 2008 officiated by Fr. Mannix Sosing of the Palo, Leyte Metropolitan Cathedral.
Good luck to both of you and GOD bless! - BANAT NEWS