CEBU - Nakaginhawa pa ang UTASSCO Utility human makabawos pinaagi sa paglubong sa Hero Commando Pistols, 82-65 sa Game-2 sa ilang "best-of-three" final series sa Power Forty Christmas League niadtong Martes sa gabii didto sa Inayawan Sports Complex.
Sa maong kadaugan, nagtabla karon ang serye nga 1-1.
Sa laing duwa, nakatabla sab sa Park ‘N Go Bakeshop dihang ila sab nga gilubong ang Christine Traders sa iskor nga 98-77 sa ilang kaugalingong "best-of-three" alang sa ikatulong dapit.
Si Alex Mercado mibahog og 21 puntos alang sa UTASSCO, samtang sila si Jun Nacional ug Wilbor Cabrera nagkumboya og 29 puntos.
Ang ilang three point king nga si Atty. Flor Yosores igo lang mi-iskor og siyete puntos.
Ang Game-3 gikatakda karong Disyembre 9 dungan sa ilang Christmas Party.
Sa sayo pa, si Michael Arias mihipos og 24 puntos aron pangulohan ang Park ‘N Go, gisundan ni Melvin Layon, kinsa mihipos og 21 puntos. Sila si Romy Rama ug Domie Ozon parehong mipupo og 12 puntos.
Ang presidente sa Power Forty nga si Vez Eleguin mikimada og 25 puntos, si Edwin Dejacto miamot og 16 puntos ug si Joey Escalon mitampo og 12 puntos.
Puntos Matag Usa
Unang duwa:
Park ‘N Go Bakeshop (98) - Arias 24, Layon 21, Rama 12, Ozon 12, Dejarme 10, Sabellano 6, Echavez 6, Colinares 5, Dimitiman 2
Christine (77) - Eleguin 25, Dejacto 16, Escalon 12, Dacalos 9, Nacario 6, Dela Rama 6, Dumale 3
Ikaduhang duwa:
UTASSCO (82) - Mercado 21, Nacional 15, Cabrera 14, Mabalcon 12, Yosores 7, Labajo 6, Yu 4, Filosopo 2, Batac 1
Hero Commando (65) - Rosal 15, Ibones 12, Lalican 12, Javierto 12, Cabañero 6, Genzon 4, Navares 2, Nacional 2. – BANAT NEWS