CEBU - Tulo ka Thai boxers nga moaway sa "Daytime Boxing 2 - Thai Invasion" card karong Domingo pakyas pagtunga sa pre-fight news conference kagahapon tungod sa mga kakulian.
Apan bisan pa niini, si international promoter Sammy G. Gello-ani mipasalig sa mga Sugbuanon nga hilig sa boksing nga madayon ang binukbukay sa gikatakdang petsa.
Ang tulo ka Thai boxers miabot unta dinhi sa Sugbu niadtong miaging gabii, apan gipugngan tungod sa pagsira sa ilang international airport human sa gihimong pag-overrun sa anti-government protesters.
Malipayon hinuon nga gipahibalo ni Gello-ani atol sa presscon didto sa Teatro Casino-PAGCOR sa Waterfront-Cebu City Hotel nga nakadawat siya og balita gikan sa kampo sa Thai boxers nga nakakita na sila'g paagi aron makabiya sa Thailand gikan sa Phuket paingon sa Singapore, Manila ug dayon sa Cebu.
"Our guests from Thailand failed to arrive on time because of the closure of their international airport that prevented all passengers to go out of Thailand. But the show will go on. Everything is on," matud pa ni Gello-ani. "They will leave tomorrow (today) morning and are expected to arrive in Cebu at 9:00 in the evening," dugang sa WBO Asia-Pacific "Promoter of the Year" awardee.
Ang tulo ka Thai boxers kinsa mopakita sa ilang katakus sa "Daytime Boxing 2" karong Domingo sa alas-8 sa buntag diha sa Mandaue City Cultural and Sports Complex mao sila si Terdsak Jandaeng, Sirichai Kokietgym ug Thiti Sithkosol.
Si Jandaeng, ang three-time world title challenger moharong sa Pinoy'ng si Joel de la Cruz alang sa WBO Oriental super featherweight championship.
Kun modaog si de la Cruz batok ni Jandaeng awtomatik kining maapil sa top 10 sa world rankings. Maghatag sab kini kaniya og kahigayonan nga moaway og world title.
Si de la Cruz nagbitbit og 10-5-1, 4KOs, samtang si Jandaeng adunay 31-3-1, 21KOs.
Sa supporting bouts, si Federation Catubay sa Sibugay, Zamboanga makigsangka ni Sirichai, samtang ni Rolando Magbanua sa Cotabato moharong si Thiti.
Lain pang mopakita'g aksiyon mao si Marvin 'Marvelous' Sonsona batok Richard Picardal, Eric Canoy batok Abner Llanasa, Rey Labao batok Leonardo Doronio, Reynaldo Belandres batok Ranel Soco, Jerry Pahal batok Romano Gelig ug Rolando Magallano batok Sebusa Gonzalo.
Ang "Daytime Boxing 2" gipasiugdahan sab sa SGG Sports Promotions ni Gello-ani ug sa INTV-CCTN Channel 47 uban sa PAGCOR-Cebu, Omega Pain Killer ug Kokeit Gym.
Ang mga tiket mapalit sa P500 sa sponsor, P250 sa ringside ug P100 alang sa general admission. – BANAT NEWS