Aguilar nakabawi sa final leg

CEBU - Ang hari sa motocross dinhi sa nasud nga si Glenn Aguilar misakmit og championship ug runner-up trophy sa duha ka kategoriya sa 14th ug final leg sa 2008 MS Motosuit Motocross Series nga giulohan og “2nd City of Carcar Mayor’s Challenge” niadtong Domingo didto sa Ramona’s Sports and Recreation Center sa Carcar.

Si Aguilar, ang MS Motosuit image model midaog sa special pro race title nga gihikaw kaniya ni Irwin Ramas-Uypitching atol sa penultimate leg. Si Aguilar mipahiluna sa ikaduha sa experts class nga gidominar ni Jon-Jon Adlawan.

Si Uypitching wala makahuygo sa katapusang aksiyon sa 2008 Motocross series ug igo lang mipahiluna sa ikatulong dapit sa duha ka dibisyon.

Misariling hinuon si Adlawan sa iyang kampanya alang sa double title dihang sila si Paul Inoc ug Winsor Pamorca miposte og 1-2 finish sa immediate ug open production diin siya napunta ngadto sa ikatulo.

Ang crowd-darling nga si John Flores mirehistro og dobleng kadaugan sa beginner’s ug novice open production gamit ang iyang bag-ong Honda 250cc dirtbike.

Si Flores mipukan ni Ayen Ledesma aron paghari sa beginner’s class, samtang si Ryan Aquirol mipahiluna sa ikatulo. Gipilde sab ni Flores ang mga karibal nga sila si Rey Barbaso ug Keith Lagura aron paghari sa novice open production.

Wala sab magpabitin si Ledesma ug misakmit og korona pinaagi sa pagpanghawod sa novice open enduro batok nila ni Nikko Redulla ug Donkey Sanchez, kinsa mitapos sa ikaduha ug ikatulo nga dapit.

Sama ni Ledesma, si Sanchez nipakita sab og maayong performance sa laing lumba pinaagi sa pagdominar sa local enduro batok ni Bonnie Bustillo.

Sa laing bahin, si Seigfred Ornopia milansang na sab og double victory pinaagi sa pagdominar sa executive A ug B, samtang si Butch Flores maoy naghari sa executive C.

Ang anak ni Seigfred nga si Earl Jean Brylle wala sab magpa-alkanse ug iya na nga naangkon sa hingpit ang korona nga wala niya makab-ot sa miaging duha ka legs dihang iyang gipukan si BJ Pepito aron pagdominar sa peewee division.

Gipasiugdahan sa MS Motosuit ni sportsman ug businessman Lou Ornopia, ang edisyon ning tuiga sa tinuig nga motocross series nakaangkon na sab og dakung kalampusan pinaagi sa gibubo nga suporta sa Imarflex Evvo Maintenance Free Motorcycle Battery, Castrol Power I, Keiz BJ Motorsales and Services, MS Unlimited, Cebu Reliance Motor Parts, Fork Oil Gaib U.S.A. ug MS Digital Prints.

Sa laing bahin, ang Carcar leg gipasiugdahan ni councilor William Racuma ug Rudy Nadela sa pagtugot ni Mayor Patrick Barcenas ug sa barangay officials sa Liburon. – BANAT NEWS