Bautista andam na vs. Ruiz

CEBU - Nagpanikad na si Rey 'Boom-Boom' Bautista sa umaabot niyang sangka batok sa Mehikanong si Heriberto Ruiz sa undercard sa Hatton-Malignaggi IBO light welterweight karong Domingo (oras dinhi sa Pilipinas) didto sa MGM Grand Garden Arena.

Matud pa sa 22-anyos nga si Bautista, nga andam na niyang buhian ang nagbaga niyang kinumo aron paludhon si Ruiz.

Ang garbo sa Candijay, Bohol nga Bautista (26-1,19KOs), mosuway paglangkat og daog aron mahatagan og laing world title fight.

Sumala pa ni ALA chief trainer Edito Villamor, nga daku na ang kalamboan ni Bautista isip usa ka mature boxer.

Gawas ni Villamor, si Bautista nagbaid sab sa iyang abilidad uban sa inilang trainer nga si Roger Mayweather, ang uyoan sa kanhi pound-for-pound king Floyd Mayweather Jr.

Mao kini ang unang pagbalik og away ni Bautista sa Estados Unidos diin gipukan kini   sa Mehikanong si Juan Ponce de Leon sa ilang WBO super bantamweight title niadtong Abril 11, 2007.

Gikan niadto, si Bautista nikulit og duha ka sunod-sunod nga kadaugan ug ang labing ulahi pinaagi sa second TKO batok sa Mehikanong si Eden Marquez aron mapanalipdan ang iyang WBO intercontinental super bantamweight title niadtong Abril 6 diha sa Waterfront Cebu City Hotel. – BANAT NEWS