GenSan MP Warriors moapil sa Liga Pilipinas

CEBU - Napun-an ang team sa Liga Pilipinas nunot sa pag-entra sa GenSan MP Warriors ni boxing superstar Manny Pacquiao ning community-based nga liga.

Ang MP Warriors maoy ika-14 nga team sa liga ug ikaupat nga koponan gikan sa Mindanao sunod sa Misamis Meteors, Pagadian Explorers ug Zamboanga Amores.

Ang MP Warriors dili bag-o sa commercial league kay nakapakita na kini'g aksiyon sa nabungkag nga Mindanao Visayas Basketball Association (MVBA) sud sa duha ka tuig.

Sa laing bahin, ang Visayas cluster, pangulohan sa First Conference champion M. Lhuillier Kwarta Padala-Cebu Niños ug sa Iloilo Warriors.

Lain pang mga koponan nga moduwa sa liga naglakip sa Harbour Centre-Taguig Batang Global, Quezon Red Oilers, Lipa-Batangas Barakos, Trace-Laguna Stallions, Ilocos Sur, Smart-Pampanga Buddies, Baguio ug Tagaytay.

Ang Cebu Niños ni multi-titled coach Raul 'Yayoy' Alcoseba maoy mo-host sa opening sa Liga Pilipinas Second Conference karong Disyembre 10 diha sa Cebu Coliseum. – BANAT NEWS