Magnolia susubok sa Batang Pier: Ever Bilena wagi

Muling malalagay sa pagsubok ang kampanya ng Harbour Centre sa 6 peat sa kanilang pakikipaglaban kontra sa co-leader Magnolia Purewater habang umaasa naman ang Toyota Otis na mawawakasan ang three-game losing streak sa 2009 PBL PG Flex Linoluem Cup sa Jose Rizal University gym.

Hawak ang 2-0 win-loss record, magtitipan ang Batang Pier at Wizards sa ganap na alas-2 ng hapon sa larong inaasahang magiging mainit at kapana-panabik dahil kapwa binabanderahan ng mga players mula sa UAAP.

Maghaharap naman bandang alas-4 ng hapon ang Toyota Otis at Bacchus Energy Drink kung saan umaasa ang Sparks na makakapasok sa win column matapos mabigo sa unang tatlong laro.

Samantala, binuksan naman ng Ever Bilena ang kanilang title-retention bid sa pamamagitan ng 66-62 panalo laban sa Muscle Tape-Lyceum sa Women’s Philippine Basketball League noong Martes sa Ynares Sports Center sa Pasig City.

Nalimita ang Gandang Pinay ni dating PBL chairman Dioceldo Sy sa 14 puntos sa payoff period ngunit nabuwag ang abanteng ito sa pagtutulungan nina Marichu Bacaro, Aiumi Ono at Remia Buenacosa. (Mae Balbuena)