CEBU - Mosulong dinhi sa Pilipinas ang three-time world challenger nga si Terdsak Jandaeng sa Thailand aron batukan si Joel de la Cruz sa Zamboanga del Norte alang sa World Boxing Organization (WBO) Oriental lightweight championship nga maoy main event sa Daytime Boxing 2 - Thai Invasion boxing extravaganza karong Nobiyembre 30 diha sa Mandaue City Cultural and Sports Complex.
Ang Daytime Boxing 2 nga sugdan sa alas-8:30 sa buntag gipasiugdahan sa SGG Sports Promotions ni Gello-ani sa abag sa kagamhanan sa dakbayan sa Mandaue, INTV-CCTN, PAGCOR sa Waterfront-Cebu City Hotel and Casino ug sa Kokiet Gym.
Sama sa unang “Daytime Boxing” card niadtong Septiyembre 14 diha sa Cebu Coliseum, ang sinukliay sa kumo kuhaan og buhing paghulagway pinaagi sa satellite ug makita kini didto sa Thailand, Laos, Vietnam, Cambodia, Malaysia ug sa lukop nasud pinaagi sa 120 ka provincial cable networks.
Kahinumduman, si De la Cruz mao ang boksidor kinsa mi-iskor og draw batok sa kanhi world champion Somsak Sithchatchawal atol sa unang Daytime Boxing.
Ang away mao unya ang taytayan ni De la Cruz aron makaaway alang sa Oriental title.
Si international promoter Sammy ‘Don King’ Gello-ani misaad nga kun mopakita og impresibong away batok sa kanhi world champion ug modaog, iyang hatagan og higayon si De la Cruz nga makaaway alang sa Oriental title.
“So, here it is. It is now up to Joel de la Cruz to get the belt,” matud pa ni Gello-ani, kinsa bag-o lang nakadawat og award sa World Boxing Organization isip “Promoter of the Year” for the Asia-Pacific/Oriental Region atol sa 21st WBO Convention didto sa Ft. Lauderdale, Florida.
Ang mga tiket mapalit sa tag-P500 sa sponsor, P250 sa ringside ug P100 alang sa general admission. – BANAT NEWS