CEBU - Mga kawani sa Bureau of Customs ubos ni District Collector Ricardo Belmonte ug mga sakop sa Customs Employees and Brokers Union (C.E.B.U.) nga hilig og basketbol mopakita na sab sa ilang abilidad sa pagbukas sa 14th District Collector’s Cup nga gikatakdang sugdan karong Nobiyembre 25 diha sa Mandaue City Sports and Cultural Complex.
Adunay lima ka teams ang magkumbati ubos sa 35-year old and below category, samtang walo ang magsangka ubos sa 35-year old and above category.
Ang MJDL Brokerage ni team owner Michael Jude D. Logarta modepensa sa ilang korona sa ikalimang higayon sa 35-year below category. Lain pang mga koponan nga nahisakop sa maong kategoriya mao ang Amancia Filmore Brokerage, Assessment ubos nila ni division chief Carlos Corsega ug Collector Maximo Reyes, Pimentel-Limasawa Brokerage ni team owner Marte Pimentel ug ang SUGBO Brokerage.
Ang Enforcement Security Service (ESS) X-ray Division kansang mga sakop halos tanan mga Customs Police ubos ni Gino Menquillan, modepensa sab sa ilang korona. Apan mas lisud ang ilang kampanya karon kun itandi sa miaging tuig tungod kay nagkalig-on na ang mga teams nga ilang mabagat nga gusto sab nga mosanta sa ilang pagdominar. Ang ubang mga teams nga mopakita'g aksiyon ubos sa maong category mao ang Dictrict Collector’s Office ubos ni Dick Gaviño ug coach Atty. Paul Alcazaren, MJDL ubos ni coach Gigi Ylaya, ang secretary sa C.E.B.U., O-COM/Pimentel, CCBI, Port Operations Division (POD) ni Edgar Caballes, Mactan nilang Dhacky Ugay ug Pinggo Matugas ug ang C-CUPA ni Ulysses Cena.
Si Dione Edera sa Customs Intelligence and Investigation Service (CIIS) nga maoy gitahasan isip commissioner sa District Collector’s Cup, samtang ang gitudlo nga chairman sa officiating committee mao si sportsman Rady Abarintos. (BANAT NEWS)