Red Bull Gilat-An Sa Texters

CEBU - Mikulit sa iyang career-high nga 42 puntos ang gwardiya sa Talk N’ Text Tropang Texters nga si Mark Cardona aron pangulohan ang ilang kadaugan batok sa Red Bull Barakos sa iskor nga 103-93 sa nagpadayong aksiyon sa KFC-PBA Philippine Cup kagabii didto sa Cuneta Astrodome, Pasay City.Ang produkto sa De la Salle University (DLSU) Green Archers nga si Cardona mao ang mibahug alang sa Tropang Texters nga nisaka na karon og 5-5 win-loss record. Atol sa first half, ang Barakos maoy unang nipadagan sa ilang opensiba sa pagpangulo ni Cyrus Baguio ug Gaby Espinas nga nikumboya og 15 puntos aron masakmit ang sayes nga labaw sa pagtapos sa first half, 50-44.

Apan sa pagsugod sa third quarter, kalit lang nahigmata ang Texters ug mibubo kini sa ilang puntos sa maong kwarter. Si Cardona mipabuhagay og 17 puntos sa maong kwarter aron itukod ang 12 puntos nga labaw sa maong kwarter, 82-70. Mikiat usab ang mga rookies nga si Jason Castro nga mipaagas og otso sa iyang 10 puntos.

Gawas ni Cardona, laing mipuntos alang sa Texters mao ang sentro nga si Ali Peek nga mitigom og 14 puntos ug Jared Dillinger nga mipuga og 9 puntos.

Sa laing bahin, ang pilderong Barakos kinsa gipangulohan ni Celino Cruz nga miposte og 15 puntos gisundan ni Gabby Espinas sa iyang 14 puntos ug rookie nga si Larry Rodriguez mikamada og 11 puntos ug milangkat og otso puntos natagak karon sa 3-7 win-loss nga baraha.

Padayon pa ang kumbati sa Barangay Ginebra Kings batok sa Purefoods Tender Juicy Giants sa pagsuwat ning balita. –BANAT NEWS