CEBU - Padayong mipahungaw sa ilang kainit ang mga magduduwa sa Mactan Island Lawn Tennis Sports Club, Inc. (MILTSCI) sa ikatulong semanang aksiyon sa 2008 Lapu-Lapu City Fiesta Tennis Tournament nga giulohan og "Mayor Arturo Radaza Cup" didto sa Lapu-Lapu City tennis courts.
Sa C-Plus category, ang MILTSCI netters miposte og laing upat ka daog aron mahawanan ang ilang dalan aron mahimong winningest team ning usa ka bulan nga torneyo, nga usa sa mga highlights sa tinuig nga kapistahan sa Birhen sa Regla, ang mahal nga patrona sa Lapu-Lapu City karong Nobiyembre 20-21.
Sila si Rommel Pinote ug Titing Augusto maoy nagduslit sa kainit sa MILTSCI pinaagi sa pagposte og 8-4 nga kadaugan batok nilang Harris Salumag ug Wilson Potot sa Marigondon TC. Sila si Pepe Dungog ug Pablito Tumulak mihipos og nipis nga kadaugan batok nilang Mario Rizon Jr. ug Mark Diamante sa Cecille's TC, 8-7.
Wala sab magbitin sila si Titing Pejo ug Jetjet Lagura ila sab nga gipilde silang Vic Quiñahan ug Roso Zaragosa, 8-4 , sila si Norman Pesodad ug Atty. Amodia midaog batok nilang Harry Ceniza ug Jun Augusto, 8-6.
Dili hinuon tanang magduduwa sa MILTSCI ang mi-iskor og daog gumikan kay usa sa ilang paboritong tandems nga sila si Pompie 'Nadal' Saturinas ug Fermin 'Agassi' Aranda napukan ngadto nilang Mike Padilla ug Dodong Lumanta sa Virlo TC, 5-8. Ingon man usab sila si Alfer Kilantang ug Narci Ybañez nga miyukbo ngadto nilang Raymund Zambas ug Mike Odi sa Timex TC, 5-8, samtang sila si Peter Godinez ug Edwin Tuñacao napilde pinaagi sa default ngadto nilang Nelson Dayuday ug Mike Bacolot sa PAL TC.
Ang aksiyon padayonon karong gabii uban ang kulbahinam nga quarterfinal showdown sa elite Class A division ug sundan sa mga duwa sa Ladies, Century Old, C Plus ug C Minus categories.
Ang maong kompetisyon gipasiugdahan ni Lapu-Lapu City Councilor Junard 'Ahong' Chan uban sa abag ni tournament director Junjun Clarito. – BANAT NEWS