Binakbakay sa Mandaue

CEBU - Himuon na karon ang ikatulong episode sa Summit Natural Drinking Water “Fight Night” boxing tour diin ang kanhi World Boxing Organization (WBO) Asia Pacific interim bantamweight champion Robert Allanic makigsangka sa dekalibreng si Carlo Magale sa Talibon, Bohol diha sa Mandaue City Plaza.

Gipaabot nga usa ka kulbahinam ug duguong kumbati ang mahitabo karong gabii diin ang 23-anyos nga si Allanic moaway aron makabawi sa iyang kapildihan ngadto ni Leonardo Doronia, samtang si Magale, kinsa rated RP No. 5, mokumbati aron pagpreserbar sa iyang rating.

 Lain pang mopakita’g aksiyon mao si RP light flyweight top contender Along Denoy, kinsa makigsinukliay og kumo batok ni Jason Geda.

Ang kadaugan ni Denoy mokandado sa iyang kampanya alang sa title showdown batok ni Mayol nga gikatakda sunod tuig.

Sa laing bahin ang kalit lang nga misulbong nga si Bon Jovi Canillas ug Robert Awetin gipaabot sab nga mopabuhagay sa ilang abilidad diin ang duha aduna may igong kusog nga ikabuga.

Ang undefeated ABS/CBN “Idol” TV series champion nga si Roli Gasca moharong sab og laing lig-on ug beteranong kontra nga si Orlan Enriquez.

Adunay 48 ka hugna sa binukbukay ang gihan-ay sa laing binulan nga pasundayag sa Summit Natural Drinking Water “Fight Night” boxing tour nga gipasiugdahan sa ALA Promotions.

Ang sunod nga episode sa fight tours dad-on ngadto sa dakbayan sa Davao diin si RP flyweight champion Rocky Fuentes maoy headline sa maong episode. – BANAT NEWS