Magnolia nakalusot sa OT

Sumandal ang Magnolia Wizards kina Dylan Ababou at Yuri Escueta upang makabangon mula sa 16-point deficit ang Magnolia tungo sa 88-80 overtime win kontra sa Pharex Generix sa pagpapatuloy ng 2009 PBL PG Flex Linoleum Cup kahapon sa Arellano University Gym sa Legarda, Manila.

Tumapos si Ababou, ng 19 puntos na pinarisan ni Eder Saldua kasunod si JP Alcaraz na may 15-puntos para sa 1-0 rekord ng Wizards.

Nagsumite naman ang 5’8 na si Escueta ng 10 mahahalagang puntos bukod pa sa 5-rebounds, 3 assists at 5 steals.

Naglaho ang 51-35 kalamangan ng Generix nang agawin ng Magnolia ang kalamangan sa 76-74, sa huling 11.6 segundo sa final canto.

Ang dalawang freethrows ni Ian Saladaga ang nagtabla ng iskor sa 76-76 para makahirit ang Pharex ng overtime ngunit umabante ang Magnolia ng 10-puntos 88-78 sa extra period at di na lumingon pa.