CESAFI U-23 football tournament ipahigayon

CEBU - Ang team mahimong makarekluta o “recruit” og mga players kalabot sa laraw sa ipahigayong Partner’s Cup-type CESAFI Under-23 Football Tournament nga gikatakda karong Enero 2009.

Na-aprobahan na sa CESAFI board ang konsepto sa Under-23 tournament nga pagasalmotan sa mga tunghaan nga sakop sa liga.

Ang dayag nga tubag gikan sa katawhan atol sa miaging season nakapaaghat ni Jonathan ‘Maxim’ Maximo, ang tournament manager sa Inter-school competition sa pagpahigayon og dugang mga torneyo ug ang maong lakang giuyonan sa tanang coaches nga hingtungdan.

“This will give justice to the school’s varsity scholarship program as well as to the players who will gain more exposure and experience by having more tournaments,” matud pa ni Maximo.

Ang maong kalihukan usa sab ka paagi alang sa mga Sugbuanong magduduwa aron andam kini sa umaabot nga try-outs sa RP team alang sa 2009 Southeast Asian (SEA) Games didto sa Laos.

Atol sa 2005 SEA Games, ang Sugbuanong si Oliver Colina nalakip sa komposisyon sa nasudnong koponan.

“If we can have this U-23 program implemented early, the chance of more Cebuanos in the RP team will increase. I would be elated if we can have two Cebuanos to the national team this time,” dugang ni Maximo.

Gumikan niini, ang team mahimong maka-recruit og mga magduduwa basta nagagikan lang kini sa tunghaan nga gidapit sa pagpaduwa kanila.

Makahatag sab kini og higayon sa mga players nga natapos na sa pagtungha o niadtong natapos na ang ilang tuig pagduwa nga makaduwa og balik sa ilang inahang tunghaan kon alma mater. – BANAT NEWS