Jr. NBA Philippines program sugdan karon

CEBU - Ang ikaduhang sunod-sunod nga Jr. NBA Philippines program nga gipresentar sa Hi-Smart sugdan karong adlawa diha sa City Sports Club-Cebu gym.

Milapad ang maong programa gikan sa 16 ka tunghaan ngadto na sa 200 lukop nasud ug gibana-bana nga moabot ngadto sa 20,000 ka mga tinun-an, ginikanan ug coaches ang motambong.

Ang Jr. NBA, ang nag-unang basketball program sa mga kabatan-onan didto sa Estados Unidos nga motudlo og fundamentals, sportsmanship ug pag-promote sa importansiya sa panglawas ug ingon man nutrisyon dad-on og balik dinhi sa Pilipinas sugod karong adlawa hangtod sa Marso 1.

Mga batan-ong lalaki ug babaye nga nagpangedaron og 12-14 anyos ang pagatudloan sa Jr. NBA S.T.A.R. values of sportsmanship, teamwork, attitude and respect.

Ang kalihukan sugdan pinaagi sa Jr. NBA Coaches Clinic nga pagadumalaon ni Jr. NBA US-based head coach Frank Lopez. Mao kini ang unang higayon nga ang Jr. NBA event gipahigayon gawas sa National Capital Region.

Alang sa dugang mga kasayoran, mahimong mo-log on sa Jr. NBA Philippines website www.nba.com/jrnba/philippines. – BANAT NEWS