Red Bull gi-ihaw sa Realtors

CEBU – Gipakaging sa Sta.Lucia Realtors ang Red Bull Barako sa iskor nga 83-80 sa nagpadayong aksiyon sa KFC –PBA Philippine Cup didto sa Araneta Coliseum, Quezon City

Ang reigning Most Valuable Player (MVP) nga si Kelly Williams mibahug og 17 puntos ug milangkat og 18 ka rebounds aron pangulohan ang Realtors nga nagtangag na karon og 4-4 win-loss nga baraha.

Sa sayung bahin sa duwa, unang nanghasi ang Barakos sa pagpangulo sa kanhi Philippine Christian University cager nga si Gabby Espinas nga mibugha og 10 puntos sa first half samtang sila si Cyrus Baguio ug Carlos Sharma mikumboya og 16 puntos aron itugway ang Barakos sa 16 puntos nga labaw sa dayong tapos sa first half, 48-32.

Apan pag-abot sa second half, gipahugtan sa defending All-Filipino Cup champion Realtors ang ilang depensa.Ang beterano nga si Dennis Espino mipabuto og nuybe sa iyang 18 puntos sa fourth quarter og si Dennis Miranda mipatusak sa iyang three-point shot aron pangulohan ang 10-2 rally sa Realtors.

Ang higanteng si Marlo Aquino mipasulod usab og kwatro puntos aron matabla ang duwa sa nahibiling 9:38 sa fourth quarter, 97-97.

Sa laing bahin, gawas ni Espinas nga maoy topscorer alang sa Barakos pinaagi sa iyang 20 puntos, laing mi-iksor sa pilderong Barakos mao ang rookie nga si Jeff Chan kinsa miduslit og 14 puntos samtang si Baguio mihipos og 13 puntos ug ang forward nga si Sharma mipuga og 10 puntos alang sa ilang koponan nga natagak karon sa 3-5 win-loss nga baraha.

Padayon pa ang pinaksitay sa nagkumbitay nga Barangay Ginebra Kings batok sa league leaders nga Alaska Aces nga mosuway paglangkat sa solong liderato sa liga, sa pagsuwat niining balitaa. – BANAT NEWS