CEBU – Mibirada na sad og laing 41 puntos si Lebron James sa Cleveland Cavaliers sulod lang sa upat ka adlaw dihang midaug ang Cavs batok sa Chicago Bulls sa iskor, 106-97 kagahapon sa nagpadayon nga duwa sa National Basketball Association (NBA) didto sa United Center sa Chicago, Illinois. Gawas sa iyang 41 puntos, si James mihimo usab og 13 ka assists samtang si Zydrunas Ilgauskas mi-iskor og 16 puntos alang sa Cavs kinsa nagbaton na karon og 5-2 nga baraha sa Eastern Conferecne.
Ang Bulls nga gipangulohan ni Ben Gordon sa iyang 29 puntos, nakakuha pa’g 77-74 nga labaw sa sayong bahin sa fourth period apan kalit lang silang namugnaw human niadto.
Si Luol Deng ug ang rookie nga si Derrick Rose mi-iskor og 20 ug 16 puntos alang sa Bulls kinsa naghupot karon og 3-4 nga baraha.
Mao kadto’y ikapitong higayon nga si James mi-iskor og sobra sa 30 puntos matag higayon nga ilang mapilde ang Bulls.
Sa laing duwa, gilat-an sa Orlando Magic ang Washington Wizards, 106-81 pinaagi sa lain na usab nga double-double ni Dwight Howard kinsa mipuntos og 31 ug milangkat og 16 ka rebounds didto sa ilang korte sa Amway Arena sa Orlando, Florida.
Ang Wizards nga gipangulohan ni Neil Young sa iyang 20 puntos, nahagsa na ngadto sa 0-5 nga baraha.
Midaug sab ang Portland Trail Blazers didto sa ilang korte sa Rose Garden sa Portland, Oregon human sila makalingkawas batok sa Minnesota Timberwolves, 97-93.
Sa laing bahin, ang New Orleans Hornets nakarekober ug midaug batok sa Miami Heat, 100-89 samtang ang Phoenix Suns kinsa aduna sa’y 5-2 nga baraha, midaug batok sa Milwaukee Bucks sa iskor, 104-96. – Gabby G. Malagar (BANAT NEWS)