Don Bosco booters 'bira titulo sa 16th Pintaflores

CEBU - Nangharos ang Don Bosco booters ug mibira og titulo sa 16th Pintaflores Football Tournament didto sa San Carlos City.

Ang Don Bosco naghari sa 8-under, 10-under, 12-under ug sa men’s 35-under division batok sa mga koponan sa San Carlos City.

Bugtong titulo nga wala mabira sa Don Bosco mao ang girls’ 17-under tungod kay wala kini entrante sa maong age category.

Sa 8-under division, ang Don Bosco-B ni coach Claudette Zapanta ug Robert Nicart mibuntog sa San Carlos City Motu Football Club aron pagdaog sa kampiyonato nga adunay limpiyong 5-0 win-loss record.

Wala sab makatilaw og pilde ang Don Bosco sa 10-under ug 12-under division. Ang pambato sa Sugbu mipukan sa Los Amigos Football Club sa 10-under final, samtang ang Don Bosco’s Cebu City Olympics-bound 12-under squad ni coach Joselito Bono ug Rommel Ramirez milupig sa San Carlos City Kids United.

Sa men’s 35-under ni coach Glenn Ramos, ang Don Bosco mao sab ang miilog sa kinata-as dapit human mikulit og lima ka daog ug usa ka draw. – BANAT NEWS