Yayoy's miposte na sab og daog

CEBU - Nigaling na sab og daog ang Yayoy’s Grill and Resto Bar human gipilde ang I-Utak, 67-62 sa nagpadayong aksiyon sa 2008 University of San Carlos Boys High Alumni Basketball Association (USCBHABA) Atan Guardo Barkadahan Cup didto sa USC-North Campus gym.

Ang Yayoy’s team ni team owner ug multi-titled coach Raul ‘Yayoy’ Alcoseba mitak-op sa unang duha ka kuwarter sa iskor nga 36-29, apan ang I-Utak mipahungaw sa ilang kainit ug mipabuhagay sa ilang opensiba aron malaslasan ang labaw ngadto na lang sa dos puntos, 49-51 sa katapusang 10 minutos sa duwa.

Hinuon, ang Yayoy’s Grill wala mahulga sa gihimo sa I-Utak ug padayon nga nakigbisog hangtod nga ilang naangkon ang singko puntos nga kadaugan.

Si Joselito Ruiz maoy topscorer sa Yayoy’s Grill sa iyang 17 puntos, gisundan ni Earl Abellanosa sa iyang 14 puntos. Si team manager Rocky Alcoseba ug Carl Ferrer miabuno og 12 puntos matag usa alang sa Yayoy’s Grill.

Ang 2008 USCBHABA season gipaluyohan sab sa Uniherb Philippines, ang nag-unang health companies sa nasud nga tiggama sa nabantog na kaayong food supplements sama sa Arthro, Heartvit, Kidneycare ug Diabet.

Puntos Matag Usa

YAYOY’S GRILL (67) -- Ruiz 17, Abellanosa 14, Alcoseba 12, Ferrer 12, Move 8, Ynclino 2, Tan 1, Bolang 1

1-UTAK (62) -- Espinosa 25, Chiongbian 10, Balaguan 8, Taborada 6, Abregonde 5, Boniel 5, Balintag 3. – BANAT NEWS