USJ-R, USC, UC sa Zonals

CEBU - Ang Cebu Schools Athletic Foundation, Inc. (CESAFI) losing finalist University of San Jose- Recoletos (USJ-R) Jaguars ug ang fourth placer nga University of Cebu (UC) Webmasters moapil sa Visayas qualifying round sa Philippine Collegiate Champions League (PCCL) nga sugdan ugma didto sa Ormoc Superdome sa Ormoc City. 

Ang Ormoc eliminations pagahimuon karong Nobiyembre 9-12. Buwag nga Zonal eliminations ang pagahimuon sab didto sa Cagayan de Oro City alang sa Mindanao cluster.

Ang Jaguars, kinsa napilde ngadto sa eigtht-time champion University of the Visayas (UV) Green Lancers sa ilang best-of-five finals, 3-1 niadtong Oktobre 8, nahimutang sa Group-B uban ang West Negros College sa Bacolod City ug ang Bohol Institute of Technology-International College (BIT-C).

Sa laing bahin, ang Webmasters didto mahisakop sa Group-A uban sa NCAA third placer Letran Knights ug sa AMA Computer College-Ormoc.

Sa opening game karong Sabado, ang UC makigsangka batok sa AMA-Ormoc ug sa gabii isunod ang Knights.

Sa Domingo, himuon ang crossover semifinals diin ang mga winners moabante sa finals. Ang makampiyon sa Ormoc leg mo-abate sa PCCL round of 16 didto sa Manila lakip na ang nagpaabot nga UV Lancers.

Mobanat sa Cagayan de Oro leg mao ang CESAFI third placer University of San Carlos (USC) Warriors, University of Mindanao, Capitol University, Far Eastern University (FEU) Tamaraws, Ateneo de Zamboanga ug Xavier University. – BANAT NEWS