Malagar brothers nanghawod 3-on-3

CEBU - Managsuong Malagar maoy mipasulabi sa Vice Mayor Ember V. Alinsug 3-on-3 basketball tournament dili pa dugay didto sa Consolacion Sports Complex.

Ang maong kalihukan usa sa mga kalihukan sa tinuig nga kapistahan sa Consolacion niadtong Oktobre 29.

Sila si Louie, Larry, Elbert ug Londy Malagar milangkat sa kampiyonato sa 22-above to 39-under category. Si Larry maoy nidaog sa MVP award.

Laing Malagar nga si Lemuel ang misubang sab dihang iyang nasakmit ang MVP trophy human niya hatagi ang iyang koponan og titulo sa 21-under. Gitabangan sab siya nila ni Mel Linao, James Jabla ug Jay-R.

Sila si RR Najarro, Bryan Ramos ug John Paul Paramel maoy miangkon sa korona sa 17-under category, samtang sila si Stephen Lada, Katiw Armean, Piktads Paramel ug Naato Gerunjo maoy nanghawod sa 40-above division.

Sila si Najarro ug Armean maoy midaog sa MVP trophy sa ilang age categories.

Ang usa ka adlaw nga kompetisyon gipasiugdahan ni Poblacion Oriental Barangay Councilor Paul Alelu Q. Flores, ang sinaligan kanhi sa Far Eastern University (FEU) Tamaraws sa UAAP. – BANAT NEWS