SHS-J, USC-NC teams molarga ugma

CEBU - Gikatakdang mogikan ugmang adlawa paingon sa Bacolod ang Sacred Heart School-Jesuit (SHS-J) Passerelle ug ang University of San Carlos (USC)-North Campus SBP teams kinsa maoy morepresentar sa Sugbu sa Visayas Regional Finals sa Milo BEST Center SBP/Passerelle twin basketball tournaments.

Nakakuha og pasaporte ang SHS-J Eagles sa Visayas Regional Finals human miposte og back-to-back championship sa Cebu leg ug ilang naugmad ang ilang runner-up finish sa miaging tuig nga Visayas Finals.

Mangulo sa kampanya sa SHS-J Eagles mao si Cebu MVP Daryl Nazareno, abagan sab kini ni team captain Gabe Branzuela, Jerry Seno ug sa presensiya nilang Justin Yu ug sa managsuong Borgy ug Justin de la Cruz.

Ubang mga sakop sa team naglakip ni Kiefer Lim, Adrian Muller, Reggie Abbu, Raul Antigua, Hordon Evono II, Kristoffer Porter, Dandan Tecson, Raymund Mangubat ug Joseph Zozobrado. Motimon sa team mao si coach Rommel Rasmo uban sa iyang assistants nga si SHS-J juniors coach Jaysar Esperat ug Helben Regodon.

Sa laing bahin, ang USC-North Baby Warriors mao sab ang gibala ngadto sa Bacolod human giharos ang mga kaatbang sa Cebu leg sa maong torneyo.

Mao kini ang labing unang higayon sa USC-NC nga moduwa sa Visayas Finals sud sa dugay na nga panahon.

Bisan pa ang USC-NC napakyas sa Mil BEST Visayas Finals sa makadaghang higayon, si coach Galimar Largo nakahatag gihapon sa team og silver medal sa Palarong Pambansa niadtong Mayo.

Naglantaw karon ang USC-NC nga mokulit og back-to-back championship alang sa Cebu dihang gisakmit sa SHS-J ang kampiyonato sa miaging tuig.

Si Andrey Armenion maoy mangu sa pundok sa mga sinaligang players nga naglakip nila ni Lorenzo Piad, Michael Balankig, Bryan Deniega ug Jude Bulan.

Ang ubang mga sakop sa koponan naglangkob nilang Steven Cedric Co, Joshua Matthew Curvo, Noriko Benedicto, Vincent Francis Sotto, Arnie Christian Padilla, Clint Uy, Marc Jubay, Dolan Adlawan, Joeven Yap ug Philip Martin Aguirre. Mo-abag ni Largo mao si kanhi USC Warrior Vernini Tangarorang.Si USC Basketball Program's Consultant Mike Reyes motabang pinaagi sa kasinatian alang sa kalampusan sa koponan.

Laing teams nga mobanat sa Visayas Finals sa SBP division mao ang Tay Tung sa Bacolod, Ateneo de Iloilo ug Filamer Christian School sa Roxas. Ang Passerelle gilangkuban sa Ateneo de Iloilo, St. John Institute-Bacolod ug ang College of St. John-Roxas. – BANAT NEWS