Bautista, Domingo way puas sa training

CEBU - Way puas, makuti ug mabudlay nga pagbansay-bansay ang gihimo nila ni Rey 'Boom-Boom' Bautista ug Michael Domingo sukad sila nakatunob sa Las Vegas niadtong Oktobre 28.

Usa ka adlaw human si Boom- Boom ug Michael Domingo niabot didto sa Las Vegas, nag-jogging gilayon sila sayo sa buntag ug dayon mibutho sa gym nga gipanag-iya sa usa sa mga tinahod nga Amerikanong trainer nga si Roger Mayweather.

Sa gym, gitirahan sa duha ka mga garbo sa ALA Stable mao ang heavy bag. Gawas niini, mipahigayon sab sila og pipila ka mga conditioning drills human sila nag-punch mitts ni Mayweather.

Si Boom-Boom, kinsa padayong nanikaysikay sa tinguha nga maka-away og balik alang sa world title, gikatakda nga makigbinukbukay batok sa beteranong Meksikanong birador nga si Heriberto Ruiz, nga naka-away na og pipila ka world champion sama nila ni Eric Morel, Rafael Marquez, Cristobal Cruz ug Victor Rabanales.

Batok ni Ruiz, ang 21-anyos nga taga Candijay, Bohol manalipod sa iyang WBO Intercontinental super bantamweight title.

Ang away nilang Boom-Boom ug Ruiz usa sa mga gikahinamang undercards sa IBO light welterweight championship bout tali nilang Ricky 'Hitman' Hatton ug Paul 'Magic Man' Malignaggi karong Nobiyembre 22 didto sa MGM Grand Hotel and Casino didto gihapon sa Las Vegas. (BANAT NEWS)