CEBU - Wala gihapon makasugat og pilde ang Houston Rockets ug New Orleans Hornets nga nagtabla karon sa 3-0 nga baraha aron pangulohan ang Southwest Division sa West Conference ingon man ang Los Angeles Lakers kinsa pabiling hapsay human sa tulo ka duwa aron sab pangulohan ang Pacific Division sa nagpadayong duwa sa NBA 2008-2009 season. Misutoy ang Rockets human ilang gipakuryentehan ang Oklahoma Thunders sa iskor, 89-77 samtang napakgang ni Chris Paul ug ang New Orleans Hornets sila si Lebron James ug ang Cleveland Cavaliers aron panalipdan ang ilang homecourt human sa ilang 104-92 nga kadaugan.
Si Paul, usa sa contender pagka MVP sa miaging tuig, mihagdaw og 24 puntos ug mihimo’g 15 ka assists aron pangulohan pag-usab ang Hornets samtang napugngan si Lebron James ngadto sa 15 puntos uban sa iyang 13 ka assists.Hinuon igo lang milabaw kaniya og usa ka punto si David West kinsa mi-iskor og 25 puntos alang sa Hornets.
Bisan pa’g nakasugat og angol sila si Tyson Chandler ug Peja Stojakovic nga parehong may piang ang tikod, pabiling limpyo ang baraha sa Hornets kinsa mi-arangkada og 31-22 puntos sa fourth period batok sa Cavs.
Si James Posey nga gikan sa defending champion Boston Celtics sa miaging season, mitampo og 15 puntos alang sa Hornets ug si Rasual Butler may 14 puntos.
Si Zydrunas Ilgauskas maoy nangu sa Cavs pinaagi sa iyang 18 puntos.
Sa laing duwa, gilumsan sa LA Lakers ang Denver Nuggets, 104-97 alang sab sa ilang ikatulong daug.
Si Kobe Bryant padayong nagmangtas alang sa Lakers ug mipugnit og 33 puntos layo kaayo kung itandi sa nangu sa Nuggets nga si Anthony Carter kinsa mipuntos og 20.
Usa ka adlaw human makahimo’g 1,000 career games sa regular season si Kevin Garnett pinaagi sa ilang 96-80 nga kadaugan batok sa Chicago Bulls, gipakauwawan sa Indiana Pacers ang Celtics sa iksor, 95-79.
Mga resulta sa laing duwa sa NBA. Orlando 121, Sacramento 103, Atlanta 98, Philadelphia 88, Detroit 117, Washignton 109, Dallas 95, Minnesota 85, Chicago 96, Memphis 86, Charlotte 100, Miami 87, Golden state 105, New Jersey 97, Toronto 91, Milwaukee 87, Utah 101, LA Clippers 79, Phoenix 107, Portland 96. – BANAT NEWS