RemEMBER milatigo sa Panthers sa MLKP Under-21

CEBU - Namunga ang paningkamot sa team RemEMBER sa final quarter dihang ilang gilatigo ang University of Southern Philippines Foundation (USPF) Baby Panthers, 85-73 sa nagpadayong aksiyon sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Ang team RemEMBER ni Consolacion Vice Mayor Ember V. Alinsug ug Poblacion Oriental barangay Councilor Paul Alelu Q. Flores maoy nikontrolar sa duwa human milabaw og singko puntos, 20-15 paghuman sa unang 10 minutos sa duwa. Apan ang USPF Baby Panthers ni coach Camilo Go mi-rally sa ikatulong kuwarter aron pag-ilog sa labaw, 56-52 paghuman sa maong kuwarter.

Mao hinuon kadto ang katapusang hunat sa USPF Baby Panthers kay ang team RemEMBER milusad og 18-0 run sa fourth quarter aron pagposte sa ilang kinadak-ang labaw, 70-56 sa nahabiling kuwatro minutos sa duwa.

Napahakan ang labaw sa RemEMBER apan wala kini makababag sa ilang tinguha pagsakmit og daog.

Sa maong kadaugan, ang team RemEMBER nagsolo karon sa ikaduhang dapit sa Bracket nga adunay 5-1 win-loss rekord sunod sa walay pildeng 5th Avenue Telecom (4-0) ni coach Marvin Flores. Ang USPF Baby Panthers nagtangag og 2-2 win-loss record. – BANAT NEWS