Fr. Vic Uy pinalitan si Garcia bilang PSC commish

Sa patuloy na pagbabagong ginagawa sa Philippine Sports Commission, itinalaga si Fr. Vic Uy bilang pinakabagong commissioner, kapalit ni Ritchie Garcia na nagsilbi sa pamahalaan sa halos isang dekada.

Ang appointment ni Fr. Uy ay pinirmahan ni Pangulong Gloria Macapagal-Arroyo noong Huwebes ngunit kahapon lamang inihayag sa media. Bago ang appointment, nanungkulan si Fr. Uy bilang PSC executive director.

“I wanted to see the appointment papers first because I could not believe it,” ani Fr. Uy na malugod na binati ni PSC chairman William ‘Butch’ Ramirez, na nagdala sa kanya sa ahensiya may isang taon na ang nakakalipas, sa kanyang bagong posisyon.

“He’s a very welcome addition to the PSC board,” wika ni Ramirez, na idinagdag na pansamantala, ookupahan ni Fr. Uy ang dalawang posisyon bilang commissioner at executive director.

“But if there’s a need to name a new executive director then it will be done,” dagdag ni Chairman.

Isang malaking sorpresa ang pagkakapalit ni Fr. Uy kay Garcia lalo na’t may isa pang bakante bilang commissioner makaraang ilipat si Atty. Ambrosio de Luna sa Department of Agrarian Reforms.