Cebu Movers mitamparos sa G&S International

CEBU - Walay paghupas ang anting-anting sa Cebu Movers System ug mikulit kini og makabungog nga kadaugan batok sa G&S International sa iskor nga 96-62 pagbukas

 sa Guadalupe Athletic Association (GAA) Christmas League niadtong Domingo didto sa Guadalupe Sports Complex.

Kini maoy ika-11 nga sunod-sunod nga kadaugan sa Movers ni playing coach Boy Te, nga bag-o lang misakmit sa korona sa GAA 9th Founder’s Cup niadtong miaging buwan.

Bisan dul-an na’g usa ka buwan ang milabay, wala gihapon tay-i ang mga kamot sa Movers ilabi na si Inting Reyes nga mikamada og 25 puntos. Laing pito ka Movers lakip ni Boy Te, mi-iskor sab og double figures timailhan sa ilang kaandam pagsakmit og laing korona.

Ang jumpshot ni Reyes maoy naghatag sa Movers sa ilang kinadak-ang labaw nga 37 puntos sa katapusang singko minutos sa duwa, 82-45.

Sukwahi ang nahitabo sa G&S International nga hapit dili mo-irog ang ilang electronic scoreboard.

Si Greg Ladaran maoy nangu sa opensa sa G&S sa iyang 20 puntos, gisundan ni Don Guillen sa iyang 16 puntos ug Jumie Ararao nga miamot og 13 puntos. (BANAT NEWS)