MILTSCI, Marigondon TC nangharos sa Lapu-lapu Fiesta Tennis

CEBU - Sila si Conrad Ordoñez ug Peter Godinez sa Mactan Island Lawn Tennis Sports Club Inc. (MILTSCI) maoy nangu sa mga mananaog sa ikaduhang adlaw sa kompetisyon sa 2008 Lapu-Lapu City Fiesta Tennis nga giulohan og "Mayor Arturo Radaza Cup" niadtong Sabado sa gabii sa Lapu-Lapu tennis courts.

Ang 64-anyos nga si Ordoñez, ang hepe sa Air Traffic Services sa Civil Aviation Authority of the Philippines (CAAP) diha sa Mactan International Airport, ug si Godinez sa San Miguel Corporation mipakaging sa duha ka parisan sa abogado nga sila si Vic Quiñahan ug Roso Zaragosa, 8-5.

Ang ilang kadaogan maoy nagtak-op sa lain na sab nga malampusong kumbati sa mga batos sa MILTSCI.

Sa 12-under category nga gilangkoban sa mga magduduwa gikan sa MILTSCI, si Bale Kinaadman mipayaka ni Kyle Calo-oy, 8-2, si Alvin Corbo milatos ni John Mark Abad, 8-0, samtang si Mary Tuñacao mingkulata ni Adrian Kinaadman, 8-2.

Ang mga pambato sa Marigondon TC mao ang nangharos sa 16-under class. Sila si Axel Rosel Tambis misero ni Irish Jaca sa Mactan Air Base TC, 8-0, ug sila si Art Kevin Tambis ug John Harris Salumag mipatikangkang nilang Hanna Jaramillo, 8-3, ug Mark Amodia, 8-0.

Bugtong garbo sa MILTSCI sa maong kategoriya mao si Joshua Kinaadman, nga mipakgang sa teammate ra sab niining si Denden Ybañez, 8-5, samtang si Mary de la Peña sa Mactan Air Base mipukan sa kauban niining si Harvey Singculan, 8-6.

Ang mga players sa Marigondon nagpadayon sa ilang pagpanghawod sa C Minus division. Sila si Boy Baguio ug Esterlito Espinosa mipatigbabaw batok nilang Rudy Tapay ug Edgar Layam sa Timex TC, 8-4, samtang sila si Arnold Tambis ug Vic Portacion milampaso nilang Carl Arriola ug Roy Lim sa Camella Homes TC, 8-3. Lain pang mananaog sa C Minus mao sila si Mark Largo ug Dave Ledesma, nga mitumba nilang Mark Amodia ug Arnold Amodia sa MILTSCI, 8-4.

Sa aksiyon sa C Plus, si Jonh Salumag ug Wilson Potot sa Marigondon TC mipalukapa nilang Ricardo Tuñacao ug Ken Tuñacao sa MILTSCI, 8-2, samtang sila si Reymond Sambas ug Mike Odi sa Timex TC milampurnas nilang Jun Diaz ug Melvin Patunil sa Y-Club, 8-4.

Lain pang duha ka parisan sa MILTSCI ang mingbahakhak human gipaluhod ang tagsa-tagsa nila ka mga kontra. Si Titing Pejo ug Jetjet Lagura mipakaging nilang Joe Art Asturga ug Ruel Pejana sa GMC TC, 8-4, samtang sila si Norman Pesodas ug Arnold Amodia yano kaayong mibugha nilang Jun del Corro ug Joseph Danosos, 8-0.   

Sa labing kulbahinam nga engkuwentro, sila si Nelson Dayuday ug Rey Bacolot sa PAL TC naka-ipsot sa manag-asawang De la Peña nga sila si Etud ug Berto sa Mactan Air Base, 8-7 (7/5).

Samtang sila si Cecille Rizon ug Merlyn Cortes, nga pulos mga Certified Public Accountants, mitunol sa labing unang pilde nilang Dr. Lecille Kilantang ug Agnes Sumalinog sa MILTSCI, 8-2.

Ang maong usa ka bulan nga torneyo, nga gipahigayon aron pagdugang sa kasadya sa tinuig nga pista sa dakbayan sa Lapu-Lapu agig pahinungod sa mahal niining patron nga Birhen sa Regla, gi-organisa ni city councilor Junard "Ahong" Chan. Mi-abag kaniya mao si tournament director Junjun Clarito uban nilang Alfir Quilantang ug Nonie isip mga sakop sa working committee. (Emmanuel B. Villaruel) (BANAT NEWS)