CEBU - Nidaug pinaagi sa usa ka unanimous decision ang kanhi two-time world title challenger Eriberto “Yukka” Gejon batok sa taga-Davao nga si Brix “Bomb” Ray atol sa ilang sangka niadtong miaging Sabado didto sa Island City Mall car park sa Tagbilaran City. Atol sa ilang away, gigamit ni Gejon ang iyang height ug reach advantage batok ni Ray. Ang Sugbuanong boksidor nipasulod usab sa iyang mga jab aron matumpag ang depensa ni Ray. Apan pag-abot sa round four, usa ka accidental head butt ang miresulta sa pagkagisi sa agtang sa Gejon, tungod sa pag-agas sa dugo sa nawong ni Gejon daling gipahimuslan ni Ray ang higayun og mipahaguros kini og mga kumo ngadto sa beteranong boksidor, wala magpa-alkanse si Gejon ug misukli usab kini og mga tira nga diriyot mipatumba ni Ray sa sixth round.
Ang tulo ka mga hurado mi-iskor og 98-94, 96-94, 97-94 pabor ngadto ni Gejon kinsa nisaka karon sa (24-4-1, 14 KOs) samtang si Ray natagak sa (3-6-1, 2KOs).
Sa undercard bout, gipahayang sa PBF featherweight champion Ricky Sismundo ang taga-Ilo-ilo nga si Reman Selim samtang ang ALA boxer nga si James Bacon mikulata ni Jojo Arnado sa Cagayan de Oro. Laing mipakita og nindot nga away mao ang manghud sa world- rated Czar Amonsot nga si Rocky Amonsot kinsa mi-iskor og first round knock-out batok kang Socrates Pasaol sa Tony Dacer stable, Davao City. Ang garbo sa San Miguel, Bohol nga si Ronilo Lawis daog batok Razem Laud sa Bacolod City, Si Eman Labanza sa Tagbilaran mipatigbabaw batok sa taga-Butuan nga si Julios Cabusas ug Francis Lee Cutanda midaog batok Jumar Cabusas. (BANAT NEWS)