CEBU - Duha ka koponan ang sayong mipadayag sa ilang partisipasyon sa ipahigayong 1st M. Lhuillier Kwarta Padala Cup basketball tournament nga gikatakdang mosikad sa katapusang semana sa bulan sa Nobiyembre.
Si event coordinator ug M. Lhuillier marketing manager Mike Roma nagkanayon nga modawat lang sila og unom ka koponan gikan sa Northern Cebu ug laing unom gikan sa Southern Cebu.
Ang Mandaue City Stallions ug ang Talisay City Aquastars mao pa lang ang nipadayag nga mosalmot sa torneyo nga gipadagan sa M. Lhuillier Group of Companies.
Giawhag sab aron mosalmot sa kompetisyon mao ang Lapu-Lapu, Danao, Bogo, Consolacion ug Liloan sa North ug Toledo, Carcar ug Naga alang sa South.
Ang entry fee nagkantidad og P3,000 matag team, apan ang organizing M. Lhuillier mao na ang mohatag og mga uniporme ngadto sa mga partisipante. Ang torneyo mosunod og single round robin, home-and away format.
Gawas sa mga tropeyo ug medalya ngadto sa outstanding individual performers, ang top three finishers makadawat sab og ganting salapi.
Ang makampiyon mobulsa og P12,000, samtang ang second placer makadawat og P10,000 ug ang third placer makaangkon og P8,000.
Alang sa dugang mga kasayoran, mahimong motawag ni Mike Roma sa telepono 233-8520. – BANAT NEWS