UC nangharos sa 8th CESAFI table tennis event

CEBU - Wala magpabangbang ang University of Cebu (UC) ug ilang giharos ang table tennis event sa 2008 Cebu Schools Athletic Foundation, Inc. (CESAFI) didto sa Hua Ching Foundation table tennis center sa Mandaue City.

Sa labing unang higayon sa kasaysayan sa CESAFI, ang UC mihakot sa tanang bulawan nga giandam sa secondary ug tertiary divisions.

Ang mga Motels ug Tormises maoy nanghawod sa individual events sa managlahing dibisyon.

Sa tertiary level, si Michael Motel naghari sa men’s singles, samtang ang iyang igsuon nga si Mary Grace mao sab ang nanghawod sa habig sa babaye.

Ang tandem nilang Jay Impuesto ug Jonathan Jacalan nidaog sa men’s doubles, si May Grace Motel ug Marian Ycot mao sab ang mipatigbabaw sa women’s doubles. Si Glendo Nayre ug Jennifer Jacalan maoy nidominar sa mixed doubles.

Sa secondary division, si Dannel Jay Tormis maoy nidaog sa gold sa boys singles. Ang iyang maguwang nga si Elona Dane misakmit sa bulawan sa girls’ division. Ang managsuong Tormis nikabkab sab og bulawan sa mixed doubles.

Sila si John Paul Baay ug Val Stephen Jaca maoy nidominar sa boys doubles, samtang ang iyang teammates nga sila si Girly Apas ug Candy Babalcon naghari sa girls division.

Ang dakung dungog nga naangkon sa UC naggikan sa collegiate team competition.

Ang UC men’s team nga gilaungkuban nilang Motel, Nayre, Impuesto ug Jacalan milupig sa USC nga gibitoonan nilang Carlo Bernados, Evan Ramos, Lloyd Bayang ug Ray Francis Flordeli. Ang USJ-R nga gipangulohan ni Judah Ray Gantuangco, nahimutang sa ikatulong dapit.

Sa women’s division, ang UC mihakot sab og bulawan pinaagi sa mga paningkamot nilang Mary Grace ug Mary Angelie Motel, Jennifer Jacalan ug Marian Ycot. Ilang gipukan ang USJ-R ni Sherry Lynn Gantuangco. – BANAT NEWS