USC, USJ-R manalipod sa ilang korona

CEBU - Ang defending champions University of San Carlos (USC) Spiking Warriors ug ang University of San Jose-Recoletos (USJ-R) belles mosuway og depensa sa ilang titulo dihang ilang harungon ang tagsa-tagsa ka kaatbang sa championship matches sa 8th Cebu Schools Athletic Foundation Inc. (CESAFI) volleyball tournament karong hapon diha sa USC-main gym.

Ang USC spikers ni coach Norvie Labuga naglaraw nga ma-grandslam, apan kalbaryo ang ilang subayon kay ang ilang banggaon mao man ang way pildeng USJ-R ni Cebu Sports Hall of Famer coach Grace Antigua sa men’s final. 

Niadtong 2006, ang USJ-R anaa sa ilang kampanya pagkuha og grand slam title, apan napakgang kini human gipukan sa USC sa finals.

Sa gihapon, ang USC pangulohan ni two-time CESAFI MVP Roderick Arenasa mohimo og graceful exit kay katapusan na man kini niyang tuig sa pagduwa sa liga.

Aron molampos, si Arenasa nagkinahanglan og suporta sa iyang kaubanan sama nilang Kennith Bensig, Bonvie Estrera, Jerone Maestre, Dexter Tuazon, Elizor Uy, Michael Alilin, Geroel Aragones ug Harvey Bernil.

Sa laing bahin, ang USJ-R magsalig sab sa ilang star players nga naglakip nilang Jacky Yrog-irog, Leoniel Sanchez, Ken Abunda, Louijie Tipgos ug Ariel Carumba.

Sa nangagi nilang mga duwa, ang depensa maoy labing lig-on nga hinagiban sa USJ-R sa ilang offensive arsenal ug ang USC kinahanglan nga mangita’g paagi pagguba niini.

Sa women’s division, ang USJ-R belles moharong na usab batok sa USPF sa ikaupat nga kampiyonato.

Seguradong kulbahinam ang   maong duwa kay mi-asenso man ang performance sa USPF itandi sa nangaging mga duwa. Gani ang USJ-R nangayo pa og lima ka set sa wala pa nila pukana ang USPF sa elimination round.  

Ang former RP youth member ug team captain nga si Genie Sabas maoy mangulo sa kampanya sa USJ-R alang sa record four-peat. Mosuporta nila sila si Michelle Simbajon, Cristy Aina Laroga, Joy Bonita, Rachel Hannah Singson, Sarah Miculob ug Carla Garces.

Sa pikas bahin, ang USPF ni coach Jordan Paca pangulohan ni 2008 Nestea Beach Volley National finalists Ericka Camille Verano ug Harlene Ybarita uban nilang Apple Seraum, Lovena Amor Pepito, Jennylou Fern Villeges, Jovielyn Abil ug Honeylyn Ybarita.

Sa dili pa ang championship games, ang Southwestern University (SWU) moharong sa USC, samtang ang USPF makigsangka batok sa University of the Visayas (UV) alang sa ikatulong dapit sa women ug men’s division. – BANAT NEWS