USC, USJ-R subling magsangka sa kampiyonato

CEBU - Subli na sab nga magsangka sa kampiyonato ang back-to-back champion University of San Carlos (USC) ug ang University of San Jose-Recoletos (USJ-R) dihang ilang gipalayas ang tagsa-tagsa ka kaatbang sa men's division sa 8th Cebu Schools Athletic Foundation, Inc. (CESAFI) volleyball tournament niadtong miaging adlaw diha sa USC gym.

Ang USC Spiking Warriors mimakmak sa University of Southern Philippines Foundation (USPF) sa upat ka sets, 3-1, samtang ang USJ-R miharos sa University of the Visayas (UV), 3-0 aron makakuha og laing higayon nga moilog sa titulo nga gihuptan sa Carolinians duha ka tuig na ang nilabay.

Sa unang set, ang USPF   naglabaw og duha ka puntos, 11-9, apan si back-to-back CESAFI MVP Roderick Arenasa ug Kennith Bensig nangulo sa rally aron sa pagpalabaw sa USC, 21-18.

Luyo sa mga paningkamot ni team captain Erwin Inso, ang USPF nakatabla, 24-all, apan ang trayanggulo nilang Dexter Tuazon, Jerome Maestre ug Bonvie Estrera nagkurambos ug mi-iskor og duha ka sunod-sunod nga puntos aron pagselyado sa kadaugan.

Sa ikaduhang set, ang USPF mao gihapon ang unang nilabaw, apan si Estrera mibawos aron hatagan ang USC og 12-9 nga labaw. Dihang nakontrolar sa USC ang ilang labaw, sila si Edward Ybañez, Michael Ryan Abut ug John Paul Pabololot milusad og 3-0 run aron pagtabla sa iskor, 24-all.

Katapusang nagtabla ang duha sa iskor nga 26-all kay sila si Maestre ug Arenasa mihimo og makalisang nga pangatake aron pagtapos sa set, 28-26 ug ingon man hatagan ang USC og 2-0 nga bentaha.

Human sa duha ka sets, daw naluya ang USC hinungdan nga nadaog sa USPF ang ikatulo nga set, 25-15 kortesiya nilang Inso, Ybañez ug Ramil Espinosa.

Nakapanemaho og kadaugan ang USC dihang nausikan ang duha ka sunod-sunod nga service errors nilang Abut ug Ybañez nga nakapaungot sa iskor sa USPF, hinungdan nga miratsada ang USC aron paglangkat sa 25-23 nga kadaugan.

Ang presensiya ni kanhi USC Vice President for Finance Fr. Vic L. Uy, SVD, kinsa nagserbisyo karon isip unang Philippine Sports Commissioner gikan sa Sugbu, nakapadasig usab sa USC Warriors.

“I am hoping that they would bag the grand slam title this year because so far I could see that the players were really trying their best to show and give pride and honor to USC,” matud pa ni Fr. Uy.

Sa laing duwa sa men's semis, ang undefeated USJ-R ni Cebu Sports Hall of Famer coach Grace Antigua wala mapugngi paglangkat sa final ticket pinaagi sa pagposte og    25-19, 25-18, 25-16 batok sa UV.

Ang title matches ug ingon man ang duwa alang sa ikatulong dapit sa duha ka dibisyon tigian ugma sugod sa ala-1 sa hapon diha gihapon sa USC main gym. (BANAT NEWS)