MILTSCI players nangharos

CEBU - Ang mga entrante gikan sa Mactan Island Lawn Tennis Sports Club Inc. (MILTSCI) maoy nangharos sa unang adlaw sa 2008 Lapu-Lapu City Fiesta Lawn Tennis Tournament nga giulohan og "Mayor Arturo Radaza Cup" niadtong Domingo didto sa Lapu-Lapu City tennis courts.

Si Dr. Lecille Kilantang ug Agnes Sumalinog maoy nagpasiugda sa gihimong pag-arangkada sa MILTSCI human ilang gipayaka ang paresan sa Cordova Tennis Club nga sila si Tiffany Limpangog ug Beverly Radaza, 8-4 sa ladies category. Si Lecille anak ni Cecilio 'Boy' Kilantang, ang committee chairman sa age-group bracket sa torneyo.

Nakigduyog nilang Kilantang ug Sumalinog sa listahan sa mga mananaog mao sila si Maricor Paden ug Procy Buanghug, nga mipatikangkang nilang Cecille Maglahos ug Maria Fe Delao sa Cordova TC, 8-3.

Wala sab magpabitin silang Jimmy Kaamino ug Fermin Aranda sa MILTSCI nga milatos nilang John Tandogon ug Vicky Huesby sa Cordova TC, 8-4, sa Century Old class.

Mitunol sa katapusang daog sa MILTSCI mao sila si Peter Godinez ug Edwin Tuñacao nga yano kaayong mimakmak nilang Dennis Arriola ug Flor Megallos sa Camella Homes TC, 8-1, sa C Plus category.

Sa lain pang bugno sa C Plus, sila si Dodong Lumanta ug Marvin Padilla sa Cordova TC mipatigbabaw nilang Roy Boiser ug Carl Arios sa Timex TC, 8-4.

Sa wala pa pormal nga sugdi ang torneyo, ang duha ka tang-ang tennis players sa Sugbu nga sila si Michael Quiñones ug Francis Largo milingaw og maayo sa tanang mga nanan-aw ug ingon man mga partisipante sa ilang kulbahinam nga exhibition match. Si Largo mipakugang ni Quiñones, 10-4.

Si tournament chairman ug city councilor Junard 'Ahong' Chan ug ang iyang assistant nga si Engr. Junjun Clarito hiniusang mipahibawo nga ilang gituyo pagpahigayon ang maong exhibition match aron adunay makat-onan ang mga entrante ug ingon man adunay inspirasyon ang mga batan-on aron hashason og maayo ang ilang abilidad.

"Amo ning gituyo kining maong exhibition match nilang Michael Quiñones ug Francis Largo aron makat-on ang mga participants ug ingon man ma-motivate kining atong mga batan-on ilabi na kadtong mga age-groups nga i-improve ang ilang abilidad sa tennis," matud pa ni konsehal Chan.

Seguradong mainit nga rematch ang mahitabo nilang Quiñones ug Largo sa pagsikad   sa kumbati sa Open A singles division.

Ang maong usa ka bulan nga torneyo nga gituyo aron pagdugang sa kabibo sa umaabot nga pista sa dakbayan pahinungod sa mahal niining patron nga Birhen sa Regla karong Nobiyembre 20-21, adunay say C Minus (beginners), 16-under and 12-under category. (BANAT NEWS)