CEBU - Ang kanhi two-division world champion ug uyoan ni kanhi pound-for-pound king Floyd Mayweather Jr. nga si Roger Mayweather motabang og train ni WBO Intercontinental super bantamweight champion Rey 'Boom-Boom' Bautista alang sa iyang umaabot nga away batok sa Mehikanong si Heriberto Ruiz sa undercard sa Malignaggi-Hatton bout karong Nobiyembre 22 sa MGM Grand Hotel and Casino sa Las Vegas, Nevada.Uban ni Bautista nga magbansay-bansay ubos ni Mayweather mao ang laing duha ka ALA boys nga sila si Michael Domingo , kinsa mao karon ang World Boxing Organization (WBO) Oriental bantamweight champion ug si Philippine light welterweight titlist nga si Mark Jason Melligen.
Mosunod sab karong Oktobre 28 si Z 'The Dream' Gorres uban ang trainer nga si Edito 'Ala' Villamor.
Ang Mandauehanong si Gorres mangandam sa umaabot niyang away batok ni Jose Lopez alang sa WBO super flyweight interim title sa undercard sa Pacquiao-De la Hoya bout.
Kahinumduman, si Roger Mayweather mao ang trainer ni Mayweather Jr. kinsa mipukan sa British brawler nga si Hatton.
Sa laing bahin, ang 29-anyos nga si Cornelius Lock mao na karon ang sparring partner ni Bautista atol unya sa iyang pagbansay-bansay ubos ni Mayweather.
Ang super featherweight nga si Lock adunay rekord nga 18-2 win-loss ug 11 sa iyang mga daog pinaagi sa knockout. – BANAT NEWS