Commando wa gihapo'y pilde, 4-0 na

CEBU - Padayon nga wala kapugngi sa ilang paghuramentado ang Hero Commando nga nakasakmit sa ilang sagunson nga upat ka daug human ilang gipukan ang UTASSCO Utility ni Atty. Flor Yosores sa iskor, 83-77 atol sa nagpadayong duwa sa Power Forty Basketball Tournament Christmas League didto sa Inayawan Sports Complex.

Unom lang sa Hero Commando ang mi-iskor apan lima kanila mihakot og double figures nga gipangulohan ni Nestor Javierto kinsa mihagdaw og 29 puntos ug sila si Cogon, Pardo Konsehal Jojo Ibones ug referee Peter Lalican may 15 ug 14 puntos alang kanila.

Ang maong kadaugan naghatag sa Hero Commando og 4-0 nga baraha.

Sa laing duwa, gipakagar sa Christine Traders ang Fag Machine Shop sa iskor 90-74 samtang ang Park ‘N Go Bakeshop naka-ipsot batok sa EBE & Allyn Piggery sa iskor, 74-72.

Si Joey Escalon maoy nangu sa Christine sa iyang 24 puntos ug si Edwin Dejacto may 17 puntos aron maka-angkon og 2-2 nga baraha samtang ilang giduot ang Fag Machine ngadto sa kinailadman sa ilang 0-4 nga baraha.

Mi-iskor sab og 16 puntos si Allan dela Rama ug mitampo og 15 puntos si Vez Eleguin alang sa Christine.

Ang Park ‘N Go gipangulohan ni Michael Arias kinsa mipusa og 19 puntos, gisundan ni Dome Ozon nga may 17 puntos ug sila si Romy Rama ug Melvin Layon parehong may 10 puntos. Sa ilang 3-1 nga baraha, nahimutang na sa ikaduhang pwesto ang Park ‘N Go Bakeshop.

Puntos kada usa:

First Game:

Park ‘N Go (74)—Arias 19, Ozon 17, Rama 10, Layon 10, Sabellano 8, Dejarme 5, Colinares 2

EBE & Allyn Piggery (72)— Moniva 18, Reyes 16, Vernaiz 16, Lisondra 9, Romares 5, Abella 4, Nuñez 4

Second Game:

Christine (90)— Escalon 24, Dejacto 17, Dela Rama 16, Eleguin 15, Dacalos 10, Dumale 6, Bacalso 2

Fag Machine shop (74)— Tabar 23, Abasolo 16, Mosqueda 16, Villoga 11, Kalinga 4, Cabrera 4 Third Game:

Hero Commando (83)— Javierto 29, Ibones 15, Lalican 14, Cabañero 10, Genzon 10, Rosal 5

UTASSCO(77)— Mercado 24, Cabrera 19, Yu 10, Cejudo 9, Yosores 7, Mabalcon 6, Gabuya 2. – GGM (BANAT NEWS)