CCC CSD batok Survivor sa Aloguinsan finals

CEBU - Mi-antug og sagunson nga lima ka importanteng puntos si Jared Kane Abatayo sa daginotong oras samtang ang mga beterano nga sila si Aldrin Ocañada ug Jerry Jaca mipakita sa ilang liderato aron baswaton ang Carmen Copper Corporation-Construction Services Department (CCC-CSD) alang ngadto sa usa ka kulba-hinam nga kadaugan batok sa Talavera team sa iskor, 91-84 aron pag-abante ngadto sa finals sa 1st Aloguinsan Mayor’s Cup fiesta tournament kaniadtong sabado sa gabii didto sa Alodome sa lungsod sa Aloguinsan sa habagatang Sugbu.

Sa sayo pa, si Ronaldo Bucao mipasulod og usa ka kagumkom nga three-point shot pipila na lang ka segundo ang nahibilin samtang si Marvin Mercado mi-split sa iyang duha ka free throws aron sab pagbaswat sa Survivors alang sa laing upset batok sa mas paboritong Mandaue City Team nga gilangkuban nilang ex-pros Dale Singson, Gilbert Demape ug Anton Villoria sa iskor, 90-88.

Busa, ang CCC-CSD ni coach Boboy Cal mao nay makigharong batok sa Survivors alang sa sudden-death finals diin ilang ilogan ang dakung kantidad nga P 70,000 cash alang sa mahimong kampiyon.

Si Abatayo, ang wala’y paghupas nga modepensa, mipasulod og lima ka puntos lakip ang usa ka triple ug usa ka lay-up sa may kataposang unom ka minutos aron pag-buak sa tabla nga 74 puntos ug nahimo kining 79-74 pabor sa CCC-CSD.

Si Ocañada kinsa maoy nangu sa CCC-CSD sa iyang 28 puntos, maoy mibutang sa icing sa cake pinaagi sab sa iyang triple aron ilang ma-inat ang bentaha ngadto sa walo ka puntos, 86-78 kapin na lang sa duha ka minutos ang nahibiling oras.

Laing duha ka free throws ni Ocañada ug ni Raul Redulosa maoy nagselyado sa kadaugan sa ilang 91-84 nga labaw may 12 segundos na lang ang oras ug naglayat-layat na ang mga dumadapig sa CCC-CSD sa tumang kalipay.

Si Abatayo, kanhi UC guard, mi-iskor og 18 puntos samtang si Jaca mitampo og 17 puntos.

Si Slaughter kinsa maoy napiling CESAFI MVP, maoy nangu sa Talavera sa iyang 16 puntos. Kataposang nakasikit ang Talavera sa iskor, 84-88 sa kataposang 47 segundos. Naglisod man tuod og depensa ang CCC-CSD ni Slaughter ilabi na nila ni Franklin Nailon ug Danny delos Santos, apan nakatabang sab sila sa rebounds bisan sila nakasinati og foul trouble.Ang laing import sa CCC-CSD mao si Mike Sereño nga maoy timbang alang sa point guard position.

Sa laing bahin, si Bucao ug Mercado maoy nangu sa Survivors sa ilang 18 ug 16 puntos.

Si Villoria nga lumad sa Carcar ug kanhi players sa Red Bull Barako sa PBA, maoy nangu sa Mandaue sa iyang 19 puntos samtang sila si Singson ug Demape parehong may 16 puntos, si Jett Latonio midugang og 14 puntos ug si Vergel Abelong may 10 puntos.

Ang Aloguinsan hoopfest maoy usa ka kalihukan alang sa ilang pagsaulog sa tinuig nga pangilin unya sa Oktobre 23-24. Ang chairman sa basketball committee mao si kanhi USP Panther Mariolito Biton.

Puntos kada usa:

First Game:

Survivors (90)— Bucao 18, Mercado 16, Mepaña 14, Gudez 13, Almonte 8, Canillo 3, Lanutan 3, Delfino 3, Lim 2

Mandaue (88)— Villoria 19, Singson 16, Demape 16, Latonio 14, Abelong 10, Omolon 8, Jueves 6, Daculan 2, Pagasian 2

Second Game:

CCC-CSD (91)—Ocañada 28, Abatayo 18, Jaca 17, Nailon 9, Delos Santos 4, Redulosa 4, Sayson 2, Montalbo 1, Arnado 1

Talavera (84)—Slaughter 16, Demotor 12, Isidro 11, Maguate 8, Tangarorang 8, Custodio 8, Garcia 5, Villanueva 4. – BANAT NEWS