USJ-R seguro na sa semifinals

CEBU - Nakasulod na sa semifinals ang University of San Jose-Recoletos (USJ-R) dihang ilang gipilde ang Southwestern University (SWU) sa tulo ka sets sa CESAFI women's division volleyball event kagahapon.

Ang USJ-R ni hall of famer coach Grace Antigua mibuntog sa SWU, 25-23, 25-17, 25-20 aron pagtapos sa eliminasyon bitbit ang 5-0 nga baraha.

Bida sa kadaugan mao sila si kanhi RP Youth members Genie Sabas ug Michelle Simbajon.

Ang University of Southern Philippines Foundation (USPF) ni coach Jordan Paca maoy nakakuha sa ikaduhang luna sa semis human gipukan ang University of the Visayas (UV), 25-17, 25-13, 25-13.

Sa crossover matches karong adlawa, ang USJ-R moharong sa University of San Carlos (USC), samtang ang SWU makigbugno sa USPF. – BANAT NEWS