CEBU - Naghinam-hinam na si ALA Boxing Gym star Rey ‘Boom-Boom’ Bautista alang sa laing malisud nga away batok sa Mehikanong si Heriberto ‘Cuata’ Ruiz sa undercard sa IBF lightwelterweight showdown tali ni Paul Malignaggi ug Ricky ‘Hitman’ Hatton karong Nobiyembre 22 adto sa MGM Grand Hotel and Casino sa Las Vegas, Nevada.
Ang 31-anyos nga si Ruiz naghupot og 39-7-2 win-loss-draw record diin 23 sa iyang mga biktima pulos pinaagi sa KOs, apan upat sa iyang pilde batok sa mga kanhi world champions Rafael Marquez, Irene Pacheco ug Mauricio Pastrana.
Sa iyang katapusang away, napukan siya ngadto sa laing kanhi world champion Eric Morel pinaagi sa unanimous decision sa ilang World Boxing Organization (WBO) Inter-Continental bantamweight championship bout niadtong Agosto 30 didto sa Ruben Rodriguez Coliseum sa Bayamon, Puerto Rico.
Si Ruiz maoy reigning World Boxing Council (WBC) FECOMBOX 118-pound champion. Iyang nasakmit ang titulo pinaagi sa 12-round shutout ni Francisco Garcia niadtong Pebrero didto sa Parque Revolucion sa Culiacan, Sinaloa, Mexico.
Sa iyang bahin, ang 22-anyos nga si Bautista, miharos sa iyang tulo ka mga away sukad sa iyang makalilisang nga kapildihan ngadto ni kanhi WBO super bantamweight champion Daniel Ponce de Leon niadtong Agosto 11, 2007.
Sa katapusan niyang pagkatkat sa ring, ang garbo sa Candijay, Bohol mi-iskor og second round stoppage ngadto sa Mehikanong si Eden Marquez niadtong Agosto 30 diha sa Waterfront Cebu City Hotel and Casino sa barangay Lahug, ning siyudad.
Si Bautista nagbitbit og 26-1 win-loss record diin 19 sa iyang mga biktima pinaagi sa KOs. – BANAT NEWS