Tahas sa UV Lancers

CEBU - Kun collegiate basketball lang ang hisgutan dinhi sa rehiyon, way makapiog sa University of the Visayas (UV) Green Lancers. Gani dili pa dugay, ilang gipamatud-an ang ilang kamangtas pinaagi sa pagsakmit sa ikawalo nilang sunod-sunod nga kampiyonato sa Cebu Schools Athletic Foundation, Inc. (CESAFI).

Sukad nga si coach Elmer 'Boy' Cabahug mao nay nagdala sa team niadto tuig 2001, wala pay nakapapahawa sa UV Lancers sa trono nga ilang nahimutangan. Tanan nga misuway sa pag-ilog sa ilang korona pulos napakyas.

Dili na makuwestiyon ang dominasyon sa UV Lancers sa lokal nga basketbol. Tanan nilang kontra magkurog na daan ang tuhod basta sila maoy kontra ug kanunay silang gikahadlokan sa matag torneyo nga ilang apilan.

* * *

Mao nang dakung hagit karon sa UV Lancers mao ang paglabni og national title nga wala pa nila matilawi. Sa National Basketball Students Championship pipila ka bulan ang milabay diha sa Cebu Coliseum, ang Lancers gipakuratan sa SWU Cobras sa finals.

Karon bulana, mas bug-at nga tahas ang pas-anon sa Lancers sa ilang pag-asdang sa Philippine Collegiate Champions League. Nakasud sila sa finals sa maong labing prestihiyoso nga collegiate basketball tournament sa nasud ugaling kay gibuntog sila sa Ateneo Blue Eagles.

Sama sa nangaging katuigan, awtomatik nga nakaangkon og luna sa Last 16 Knockout Stage ang UV gumikan kay sila may kampiyon sa CESAFI. Apan para nako, bukid ang ilang sakaon gumikan kay kun molampus sa unang hugna, sunod nga banggaon sa Lancers mao man ang powerhouse La Salle Green Archers.

Duna koy salig sa kapasidad sa UV apan para nako ang Green Archers usa ka dakung tunok nga kinahanglan nilang ibton aron ilang matugkad ang dugay na nilang gipangandoy nga kampiyonato sa CCL - ang torneyo nga maoy modetermina kun kinsa maoy labing hawod nga collegiate basketball team sa nasud.

* * *

Sa miaging mga adlaw, na-busy ta'g gamay gumikan kay gi-atiman man nato ang usa sa labing suod nakong higala nga si Mark Bendecio. Tungod sa iyang trabaho isip seaman, panagsa ra ming magkita ug makahugpong og balik nga mga barkada mao nang akong gisulit ang akong panahon pakig-uban kaniya.

Seguro matingala mo nganong ako siya gihisgutan sa akong lindog. Si Migo Makoy man gud maoy usa sa akong panaminan aron ma-aninaw ang tinuod nga panaghigalaay. Grabe ang among kaagi sa dihang nagtungha pa kami sa kolehiyo. Dili na lang nako i-litanya pa kay iya-iya man tag istorya sa kinabuhi. Ang akong i-ambit mao ang panaghigalaay nga way atrasay ug sa kanunay way limtanay bisan og managlahi na karon nga dalan nga among gibaktas sa kinabuhi.

* * *

Ako diay'ng mainiton nga pahalipay ngadto sa akong higala nga si Eldon Bacolod Almario ug ni Jeaneth Basilgo sa Adznet Internet Cafe nga pulos magsaulog sa adlaw nilang natawhan ugmang adlawa, Oktubre 16. I wish you both good health, enduring happiness and peace of mind. Stay safe and sound and God bless you always.

Congratulations sab ngadto ni manong Eduardo P. Jayag, nga na-promote gikan pagka-kapitan sa barko ngadto na sa usa ka superintendent. Si Nong Eddie uyoan ni Migo Makoy ug bisan kausa ra mi magkita sa ilang pinuy-anan didto sa Manila, iya kong gihangop nga mura sab ko og sama sa buotan niyang pag-umangkon. Nong Eddie more power ug sa kanunay, Bon Voyage!

* * *

Kun dunay mga reaksiyon mahimong mo-email sa [email protected]. – BANAT NEWS