CEBU - Human sa dul-an sa duha ka bulan nga pahulay, ang daredevils nagpanikad na usab nga mopakita sa ilang abilidad sa ipahigayong Keiz BJ Motocross Invitational Open karong Oktobre 26 sa Caduawan, Tabogon sa amihanang bahin sa Sugbu.
Ang Keiz BJ Motocross magsilbe nga 13th leg sa 2008 MS Motosuit Motocross series gipangamahanan ni Lou Ornopia, ang 2007 Sportsman of the Year” awardee sa Sportswriters Association of Cebu (SAC).
Mga banggiitang riders lukop nasud ang mopakita sa ilang abilidad. Kini naglakip nilang Glen ‘D King’ Aguilar, Pepo Rubi, Irwin-Ramas Uypitching, Ted Conde, Jon-jon Adlawan, Juvannie Abellar, Paul Inoc ug si Clark Wagas, kinsa maoy nanghawod sa experts division sa 1st Danao Motor Show niadtong Agosto 23, didto sa Danao City.
Apan ang masentro sa maong kompetisyon mao si undisputed king sa nasud nga si Aguilar ug Jon Flores nga pulos mga MS Motosuit image models ug ingon man ni reigning “Rider of the Year” nga si Aguilar.
Si Seigfred Ornopia, kinsa kanunay moposte og double victory sa maong series, ang managsuong Gener ug Iting Sicad, Bonnie Bustillo, Donkey Sanchez, Keith Galaura ug uban pa ang mopakita sab sa ilang abilidad sa tagsa-tagsa nila ka dibisyon.
Ang talentong anak ni Seigfred nga si Earl Jean Brylle mopakita sab sa iyang talagsaong abilidad ubos sa peewee division.
Ang 8-anyos nga si Brylle maoy kampiyon sa 1st Vice Mayor Chonse Moreno Motocross Cup, ang 9th leg sa 2008 MS Motosuit Motocross Series didto sa Aloguinsan, Cebu.
Nakampiyon sab siya sa Moalboal, Danao, Casili ug sa Carmen ug second placer didto sa Bohol.
Mga ganting salapi ug tropeyo ang maangkon sa mga top performers gikan sa nagkalain-laing mga kategoriya.
Ang maong kompetisyon nga usa sa mga kalihukan ning tuiga sa tinuig nga kapistahan sa Mother of Perpetual Help karong bulana, gipasiugdahan ni Seigfred Ornopia sa Keiz BJ Motorsales and Services uban sa abag ni Gener Sicad. (BANAT NEWS)