CCC Builders sud semis sa Aloguinsan Mayor's Cup
CEBU - Ang Carmen Copper Corporation (CCC) Builders nga nagbase sa Lutopan, Toledo City milubong sa Britt Basic Basketball, 113-58 aron pagharos sa ilang tulo ka duwa sa elimination round ug pag-abante sa semifinals sa Aloguinsan Mayor's Cup Open basketball tournament.
Sulod sa tulo ka duwa, ang kanhi commercial standout nga si si Jerry Jaca mao kanunay ang nangu sa CCC Builders ni coach Boboy Cal.
Sa ilang duwa batok sa Britt Basic Basketball nga gipangulohan nilang ex-pro Bonel Balingit ug Roel Gomez, si Jaca mi-iskor og 21 puntos, samtang si Roy Arnado mi-iskor og 17 puntos. Sila si Wilbert Sayson ug Aldrin Ocañada nagkumboya og 25 puntos.
Niadtong Oktobre 3, ang Builders mikulit sa ikaduhang daog dihang ilang gilubong ang Ave Maria Sanctuary Park, 91-78 ug niadtong higayona si Jaca mi-iskor og 28 puntos, samtang si Ocañada mibugha og 19 puntos.
Ang Builders mikulit sa una nilang daog pinaagi gihapon sa paglubong sa Maque Team, 108-87 niadtong Septiyembre 27. Si Jaca miposte og game-high 31 puntos, samtang si Ocañada mirehistro og 24 puntos.
Ang makampiyon mobulsa og P70,000, ang second placer makaangkon og P50,000, ang third placer makadawat og P35,000 ug ang fourth placer makaangkon og P10,000. (BANAT NEWS)
- Latest
- Trending
