CEBU - Padayong mipupo og daog ang Atan Guardo dihang ilang gilubong ang Greenbank, 92-75 sa nagpadayong aksiyon sa Banawa Riverside Athletic Association (BRAA) basketball tournament didto sa Banawa open court nga gipanag-iya sa pamilyang Gillamac.
Kaabtik ug kakusog maoy gihimong hinagiban sa Atan Guardo pagpukan sa Greenbank.
Ang Atan Guardo nabiyaan og dos puntos sa halftime, 40-42, apan dali kining nakahimo og mga kausaban sa ilang opensiba ug maoy ilang gihimong gabayan aron pag-ilog sa labaw, 66-62.
Sukad niadto, gidominar na sa Atan Guardo diin ilang gikandadohan ang Greenbank sa iskoring sa fourth quarter, 26-13 aron pag-angkon og 17 puntos nga kadaugan.
Si Michael Cinco maoy topscorer sa Atan Guardo sa iyang 20 puntos, samtang sila si Richard Gubaton ug Jeffrey Panerio mitampo og 14 puntos matag usa.
Sa maong kadaugan, ang Atan Guardo maoy nanghawod sa elimination round sa Bracket-C sa 3-0 nga baraha, samtang ang igsuong koponan Yok Kalla nahimutang sa ikaduha sa Bracket-A sa ilang 2-1 nga baraha ning tulo ka bulan nga torneyo nga gipasiugdahan ni Boy Allan Lataza, team manager kaniadto sa Tribu Sugbo sa nabungkag nga National Basketball Conference (NBC).
Gibutyag ni Lataza nga special awards ang ihatag ngadto sa MVP, Mythical Five, best coach, sportsmanship (individual ug team), best muse ug 3-point shootout champion human sa conference.
PUNTOS MATAG USA
Atan Guardo (92) -- Cinco 20, Gubaton 14, Panerio 14, Villarosa 8, Panerio, Jr. 8, Comedero 8, Calam 6, Mulchandani 6, Arciaga 4, Canatan 3, Labay 1
Greenbank (75) -- Maloloy-on 24, Arnel 11, Henry 7, Albert 6, Rufino 6, Godinez 5, Junior 4, Victor 4, Joey 2, Richard 2 (BANAT NEWS)