11 ka koponan apil sa kumbati

CEBU - Nahapnig na ang tanan alang sa pagpahigayon sa ikatulong edisyon sa Congressman Red Durano Cup Inter-Town Basketball Tournament karong Sabado adto sa Danao City Sports and Civic Center.

Napulo'g usa (11) ka teams nga sakop sa ikalimang distrito sa lalawigan sa Sugbu nga pangulohan sa defending champion Liloan ang moapil sa kumbati ning tinuig nga liga.

Laing mopakita'g aksiyon mao ang team gikan sa Borbon, Catmon, Compostela, Danao City, Pilar, Poro, San Francisco, Sogod ug Tudela.

Ang torneyo gibuak sa duha ka grupo -- ang mainland ug ang island divisions. Mosubay kini og single round robin format diin ang top three teams sa mainland ug ang top seeded sa island group moabante sa semifinals.

Makampiyon sa maong torneyo mobulsa og P50,000, ang ikaduha makadawat og P30,000, samtang ang mopahiluna sa ikatulo ug ikaupat makaangkon og P20,000 ug P10,000 matag usa.

Usa ka Italian-made trophy nga mobalor og P20,000 ang giandam alang sa koponan nga makampiyon sa makatulo ka higayon.

Matud pa ni event organizer Rep. Red Durano nga ang Inter-Town competition gitukod isip paagi aron maghiusa ang nagkadaiyang kalungsoran ug siyudad nga ubos sa ikalimang distrito sa Sugbu. Usa usab kini sa ilang pamaagi aron makaplagan ang talento sa kabatan-onan sa ilang distrito.

Ang liga nakakaplag na og lima ka mga magduduwa kinsa karon nakapahimulos sa athletic scholarships isip miyembro sa basketball varsity team sa ilang tagsa-tagsa ka tunghaan sa CESAFI. Sila mao si Alfred Belande sa Sogod, Eric Zanoria ug Eleazar Armecin sa Danao, Joseph Escober ug Lloyd Poligrates sa Camotes nga pulos niduwa sa Southwestern University (SWU) Cobras ug Eulogio Laniosa sa Danao nga niduwa sa Cebu Institute of Technology (CIT) Wildcats.

Ang defending champion Liloan moparada gihapon sa ilang players nga nidaog sa kampiyonato sa miaging tuig ug ning higayona moduwa uban sa team si Mayor Vincent Franco 'Duke' Frasco. (BANAT NEWS)